Las retschertgas en vista a questa votaziun avevan atgnamain mussà in auter maletg. Tenor ellas hai dà ina grond'approvaziun da la lescha davart l'identitad electronica. A la fin èsi dentant vegnì stgars. Cun 50,4% ha la populaziun decis dad approvar la lescha davart l'identitad electronica. Surtut en ils chantuns cun blera populaziun sco Turitg, Genevra e Vad ed en las citads hai dapli sustegn. La participaziun ha muntà a var 50%.
Lescha e-ID
Svizra: Lescha federala davart la cumprova electronica da l’identitad
-
GEA
1'384'549 Vuschs
-
NA
1'363'283 Vuschs
Cun quai ch'i sa tracta d'ina votaziun davart ina lescha federala, dovri per l'e-ID be la maioritad da las vuschs. Ina maioritad dals chantuns da dovri betg – e n'avessi en quest cass er betg dà.
Opposiziun è stada gronda
Ina raschun per quest resultat stgars vesa il correspundent da RTR a Berna Adrian Camartin en la mobilisaziun da la populaziun en las regiuns champestras. Lezza è er stada activa fermamain en la decisiun davart fatschenta enturn l'aboliziun da la valur da l'atgna locaziun. Questas gruppas da votantas e votants èn savens pli scepticas envers la regenza e las instituziuns.
En connex cun la e-ID era la dumonda centrala, sch'ins sa fida dal stadi ch'el na fetschia betg abus da l'identitad electronica u sch'el sforza indirectamain la populaziun da duvrar quella. Resalvas devi per exempel ch'ins pudess incassar taxas per servetschs ch'èn stads fin ussa gratuits e pussaivel al spurtegl.
Golder: «Votum da disfidanza» envers il stadi
Il politolog Lukas Golder ha ditg envers SRF che surtut parts conservativas hajan mobilisà bleras persunas. Surtut persunas ch'èn critics envers il stadi – che vegn ad esser l'editur da la carta d'identitad digitala – sajan vegnids mobilisads. Golder interpretescha la decisiun stgarsa sco «votum da disfidanza» envers la regenza.
A la fin haja dà in duel stretg tranter las citads e las regiuns plitost ruralas. Plinavant han persunas ord la Svizra franzosa mussà levet dapli sustegn per l'e-ID. Davart l'identitad electronica saja la Svizra in pajais «ferm dividì», uschia Lukas Golder.
Beat Jans: «Confederaziun surpiglia la respunsabladad»
Er il minister da giustia, Beat Jans, ha constatà che la decisiun è stada stgarsa. Sco quai ch'el ha ditg a Berna avant las medias vegnan ins vinavant a lavurar vid la lescha. Plinavant ha Jans fatg cler che la e-ID vegnia a restar facultativa. Il Cussegl federal saja dentant surlevgià da la decisiun. La maioritad da la populaziun sa giavischia ina carta d'identitad electronica, edida e controllada dal stadi.
La e-ID vegnia a rinforzar il service public e porscher ina varianta segira. Plinavant haja la debatta enturn la lescha purschì ina buna plattafurma per discutar davart la digitalisaziun. Er il tema protecziun da datas saja vegnì tematisà – insatge che saja impurtant tenor il Cussegl federal. Cun la decisiun dad oz vegnia la e-ID sut controlla democratica.
Beat Jans ha dentant er envidà a tuttas e tuts da nizzegiar las variantas da test ch'i dat actualmain. Cun dar in resun e feedback constructiv possian ins surpigliar responsabladad per in product che gida a la populaziun.
Grischun di Na cun 51,7%
Il Grischun refusa la lescha davart l'identitad electronica. 51,74% da la glieud è cunter quella – la differenza tranter Gea e Na èn tar passa 2'000 vuschs. La participaziun munta a var 48%.
Grischun di Na a l'identitad electronica
Resultat grischun
Il pli fervent Na a l'identitad electronica vegn da la vischnanca Avras cun 73,9% Na. La pli gronda approvaziun vegn da Lantsch cun 59,8% per. Vesì sur las regiuns èn be l'Engiadin'Ota e las regiuns Imboden e Plessur per la nova identitad electronica. Tut tschellas regiuns èn plitost cunter.
Co vai vinavant?
La finamira da la lescha davart l'identitad electronica è da stgaffir ina basa legala per ina cumprova electronica statala d’identitad. Cun questa duessan persunas s'identifitgar a moda facila e segira sin via electronica – quai en l’internet, envers administraziuns svizras e per part era envers fatschentas. L'utilisaziun da la e-ID n'è betg prescritta. La Confederaziun n'incassescha naginas taxas.
Cun quai che la lescha è gia passada atras il parlament – la votaziun actuala hai dà pervia d'in referendum – vai uss vid la realisaziun. Il pli baud la stad 2026 duain persunas interessadas pudair empustar in'identitad electronica. Quai duai capitar sur l'app «Swiyu», ch'ins po actualmain nizzegiar en ina varianta da test.