Il problem che persunas na chattan nagina abitaziun pajabla saja en tut las regiuns acut. Pervi da quai ha la PS oz lantschà quest’iniziativa en il rom dal di da partida. Tenor il text da l’iniziativa duess questa finamira vegnir cuntanschida suandantamain: Il chantun Grischun duess metter a disposiziun in fonds per spazi d’abitar ed emplenir quest a l’entschatta cun 100 milliuns francs. Davart ulteriuras contribuziuns vegn a decider il Cussegl grond.
Cun quests raps duessan las vischnancas ed ils purtaders d'abitaziuns d'utilitad publica vegnir sustegnì sch’els cumpran terren per bajegiar abitaziuns pajablas. U sch’els cumpran immobiglias per suenter dar a fit.
Ins auda da tut las regiuns dal chantun, che las persunas na pon betg pli sa prestar il spazi d’abitar. Cun quest’iniziativa vulain nus far insatge encunter.
La presidenta da la partida social democratica dal Grischun, Julia Müller di, che uss sto vegnir fatg insatge. Ella è era da l’opiniun che la politica è en il duair da fat insatge encunter la situaziun actuala che pertutga bleras persunas.
Segunda emprova
Questa proposta dal fonds per spazi d’abitar ha la PS schont fatg en il Cussegl grond. Quest ha dentant refusà quest’idea. Pervi da quai emprovan els uss quai cun questa iniziativa. Entaifer in onn han els da ramassar 3’000 suttascripziuns.
