Mangiar mangiativas tradiziunalas dal Grischun, sco per exempel capuns, visitar edifizis culturals ed emprender d'enconuscher indigens che discurran la lingua rumantscha – quai ed anc dapli fan quest'emna 61 giuvenils da l'entira Svizra en il chantun Grischun.
Quest èn giuvenils e betg mo in pèr vegls en las vals che moran bainbaud ora. Els pudessan era s'interessar per insatge auter, ma els s'interessan per la lingua rumantscha.
Els participeschan numnadamain a l'emna cumpacta dal project «Rumantsch a distanza» da la Lia Rumantscha. Il rom da scola facultativ dat la pussaivladad a giuvenils da tut la Svizra d'emprender il rumantsch online – e quest'emna era da sfunsar directamain al lieu en la cultra da la Rumantschia.
Insatge che fa plaschair al manader da furmaziun da la Lia Rumantscha, Linard Martinelli, ch'è responsabel per la coordinaziun dal project, è il grond interess dals giuvenils dad emprender rumantsch e che quai è creschì uschè ferm. Anc avant in onn han mo 12 giuvenils prendì part a quest'emna cumpacta – quest onn èn quai tschintg giadas dapli.
La motivaziun dals giuvenils è differenta. Per intgins èsi vairamain in return tar las atgnas ragischs, perquai ch'i vegn discurrì rumantsch en la famiglia. Auters vulan anc emprender in'ulteriura lingua naziunala da la Svizra ed intgins han l'emprim contact cun la lingua.
Quest onn van las scolaras ed ils scolars a Glion en Surselva, a Riom en il Grischun central ed a Lavin en l'Engiadina Bassa ed emprendan ils differents idioms da la vischnanca respectiva. Insatge nov da quest onn. Las participantas ed ils participants sa repartan en ils lieus ed emprendan lura en gruppas pli pitschnas. Tgi che va nua, han ils scolars e las scolaras gia oravant pudì decider sezzas. Per finir l'emna cumpacta vegnan tuts in venderdi puspè ensemen a Cuira, per gist mussar tge ch'els han emprendì durant l'emna.