Pervia da las temperaturas autas e pervia da la setgira extraordinaria è en vigur en pliras regiuns dal Grischun in scumond absolut da far fieu en il liber.
Il scumond absolut da far fieu vala per:
- Val dal Rain da Cuira
- Partenz
- Scanvetg
- Surselva
- Mantogna/Tumleastga
- Schons-Alvra
- Moesano e Puschlav
Las prognosas da l'aura actualas mettan vinavant en vista temperaturas fitg autas e be intgins urizis cun paucas precipitaziuns. L'extensiun dal scumond da far fieu sin ulteriuras regiuns resp. sin l'entir chantun na possia betg vegnir exclusa, sco l'Uffizi da guaud e privels da la natira Grischun communitgescha.
Fieus pon sa furmar fitg tgunsch
L'aura sitga e chauda sco er dis cun bler vent han setgentà fermamain ils funs dal guaud e la bostgaglia las ultimas emnas. En pli è la bilantscha da las precipitaziuns da l'emprima mesadad da l'onn cleramain sut la media da plirs onns. Fieus pon sa furmar fitg tgunsch cun questas cundiziuns e sa derasar rasantamain.
La situaziun en Svizra
Pervi da la sitgira actuala en cumbinaziun cun la nova unda da chalira regia in grond privel d'incendis da guaud en bleras parts da la Svizra. En quasi tut ils chantuns dal nord vala perquai in scumond da far fieu en il guaud ed en la vischinanza dal guaud. En la Svizra Centrala ed en Svizra franzosa vala per gronda part in scumond da far fieu cundiziunà. Quai munta ch’igl è mo lubì da far fieu en fuainas fixas ed era quai mo cun precauziun. Scumonds absoluts da far fieu valan plinavant er en l'entir Tessin ed il Vallais.
Pli chaud zercladur
Il mais passà è stà il pli chaud zercladur en l’Europa dal Vest dapi il cumenzament da las mesiraziuns. Quai ha communitgà Copernicus, il Program da l’UE per observar la Terra. En media haja dà 20,7 grads – quai sajan passa trais grads dapli ch’en media dals onns 1991 fin 2020. L’unda da chalira la segunda mesadad dal zercladur haja procurà en blers pajais en il vest da l’Europa per temperaturas da record. Er la temperatura da l’aua sin la surfatscha da las mars saja stada uschè auta sco anc mai. Copernicus avertescha dals privels che la chalira muntia per ils umans, ils sistems ecologics e l’infrastructura en l’entir’Europa.
Unda da chalira cuntinuescha
Dapi mardi regia la proxima unda da chalira en Svizra. Las temperaturas pudessan crescher fin 35 grads. La Confederaziun ha perquai dà ora in avertiment da chalira sin stgalim 3 – quai fin almain proxima gievgia. Ed er en il Grischun stopp’ins quintar cun dis da chalira, sco Jürg Zogg dad SRF Meteo ha ditg envers RTR.
En la regiun da Cuira datti 30 fin a 33 grads. Anc pli chaud vegni cunzunt en il Mesauc cun 35 u 36 grads.
Grondas pluvidas n’èn actualmain betg en vista. Tenor Jürg Zogg poi a partir dal venderdi dar in u l'auter urizi, cunzunt en il sid dal chantun, la fin d'emna forsa era en autras parts dal Grischun, dentant be fitg local.
Per terminar la sitgira dovri plirs dis plievgia intensiva.
Uschè chaud sco l’ultima unda da chalira na daventia dentant betg, sco Jürg Zogg ha ditg. Uschia ch’ins possia la notg anc bain sfradentar las stanzas cun avrir las fanestras. En la regiun da Cuira dettia la notg temperaturas minimalas da 16 grads u en il decurs da l'emna enturn 18 grads. Pli frestg vegnia en l'Engiadina. A Samedan pon ins las proximas notgs quintar cun temperaturas da 3 fin 5 grads e la fin d'emna enturn 6 fin 7 grads.
Pli chaud – pli sitg – pli inflammabel
Cun las fasas extendidas da chaliras vegni era pli e pli sitg. Be l'Engiadin'0ta e l'Engiadina Bassa valitescha la Confederaziun anc betg sco sitg.
