69 persunas cun dretg d'eleger han gievgia saira chattà la via en la sala polivalenta a Sagogn. Suenter in curt bainvegni da la presidenta èsi spert vegnì concret: las elecziuns dals novs commembers.
Quatter candidats èn sa mess a disposiziun. Il resultat è cler: elegids èn Cletus Maissen, Ruedi Käser e Richard Jezler.
Per la presidenta Katrin Blumberg in levgiament.
Jau sun fitg levgiada che nus essan puspè cumplets. Jau hai il sentiment che nus avain in bun team ed jau ma legrel fitg sin la collavuraziun.
Betg elegì è Joachim Dünneisen, ch'era medemamain sa mess a disposiziun – quai dentant mo, sche nagin auter s'annunzia. La suprastanza è uschia – suenter plirs mais – puspè cumpletta.
In pitschen dagut d'amarezza resta – jau avess gì plaschair, sch'era ina dunna u insatgi pli giuven fiss stà da la partida. Quai chat jau schon donn.
Quai cun ina dunna sco presidenta e quatter umens – tuts enturn la vegliadetgna da pensiun. Qua sa tschent'ins schon la dumonda, nua èn las dunnas engaschadas?
L’interess dad intginas dunnas fiss dal reminent qua
Co Katrin Blumberg declera, fiss l’interess dad intginas dunnas stà qua e tuttina n'hai tuttina betg tanschì per ina candidatura. Ils dubis da dumagnar famiglia e lavur communala sut in tetg sajan stads memia gronds.
Jau sun fermamain persvadida ch'i fiss cumpatibel – tanta lavur n'èsi numnadamain betg. Il proxim onn e mez stuain nus simplamain anc far in zic lavur da persvasiun.
Co motivar las dunnas? Quai saja uss grev da respunder, di la presidenta. Impurtant saja dentant da prender per mauns quella tematica – e quai ad uras e betg pir duas emnas avant las elecziuns il 2027.
Tge spetga uss?
En emprima lingia vali ussa dad ina giada s'organisar en il nov team da suprastanza. Quai munta guardar tgi ch'ha tge cumpetenzas per uschia reparter ils ressorts. Il giavisch da la presidenta èsi era da far in di da strategia e quai uschè spert sco pussibel.
Ils trais commembers entran en uffizi immediatamain – elegids èn els fin mez da l’onn 2027. Lura hai puspè num eleger ina nova suprastanza.
E tgi sa... forsa datti lura era ina u l’autra candidatura da dunnas.