Quest onn na datti nagin «Rheinquelle-Trail» sisum la Surselva. Il maraton da trail cun partenza ed arrivada a Sedrun planisà ils 6 da fanadur 2024 stoppia vegnir annullà per motivs organisatorics. Quai scrivan ils organisaturs sin lur pagina d’internet. Participantas e participants che sajan gia s’annunziads vegnian contactads ils proxims dis. La taxa da participaziun vegnia restituida.
Pliras raschuns
La digren da participantas e participants, la mancanza d'in president, differentas opiniuns entaifer il comité d'organisaziun e la fin finala la pitschna motivaziun da far vinavant haja manà ch'ins haja tratg la fautsch en il chanvà ed annullà la cursa da quest onn sco er gist schlià l'uniun, uschia Beat Hosang, il cassier dal comité d'organisaziun. Il post da president era gia vacant dapi in onn. Ins haja fatg tut il pussaivel da chattar in nov president, era intern, dentant senza success. Betg in problem saja però stà da chattar gidanters per il di da cursa, uschia Hosang vinavant.
Adina pli paucs curriders
Tar la premiera dal «Rheinquelle-Trail» il 2020, durant il temp da corona, eran anc stads a la partenza radund 500 curridras e curriders. Avant in onn han lura strusch 200 vulì far la cursa ch'ha manà sin il Tgom, sur il Piz Cavradi al Lai da Toma, vinavant sur il Piz Pazzola via il Pass Alpsu enavos a Sedrun.
I fa schon mal, pertge il product era buns. Er ils resuns èn adina stads positivs. I saja ina cursa bella e spectaculara che vegnia organisada bain, uschia il tenor dals participants.
La fin dal Rheinquelle-Trail
Cun schliar l'uniun è la probabilitad gronda ch'i na vegn insumma betg pli a dar questa cursa che vess festivà quest onn il pitschen giubileum da 5 onns. Far pausa in onn è tgunsch la mort, quai hajan ins gia vis avant bun 20 onns tar la Cursa dal Rain a Mustér ch'era suenter intginas ediziuns vegnida sutterrada ord sumegliants motivs, di Beat Hosang ch'era gia involvà en la cursa dal Rain. Chattà glieud che s'engascha saja era adina ina sfida. Plinavant è il fatg che la regiun da Sedrun u er Mustér sa chattia en la periferia, quai ch'engrevgeschia da carmalar participantas e participants, ed ils indigens na fetschian sco i para betg gugent cursas. Lura dettia era in mantun cursas da trail en quasi mintga cantun uschia che la concurrenza è gronda, precisescha Beat Hosang.
Or da l'archiv:
