L'onn 2025 ha cumenzà tar la Sanasurselva sco il 2024 é ì a fin. Cun charplina en la suprastanza. Damai che Patrick Schaniel aveva tratg il december 2024 la fautsch en il chanvà ed abditgà per immediat sco president da la Sanasurselva, han ils delegads e las delegadas gì d'eleger ils 16 da schaner in successur.
Las turbulenzas cuntinueschan
Durant quella sesida hai danovamain dà turbulenzas. Marcus Beer che fiss gugent daventà la direcziun da la SanaSurselva e che aveva annunzià sia candidatura, ha pers la cursa per il presidi encunter il candidat da surpraisa René Epp. Lezza candidatura n'era betg enconuschenta a tut ils delegads avant la sesida e quest fatg ha procurà per situaziuns turbulentas suenter l’elecziun dal nov president.
Anc durant la sesida ha il commember da suprastanza da la Sanasurselva e president communal da Schluein, Ralph Schlaepfer bandunà la sesida e la suprastanza da la Sanasurselva.
Sche gnanc jau sco commember da la suprastanza da la Sanasurselva survegn tut las infurmaziuns basegnaivlas per exequir mes uffizi, alura na fa quai nagin senn che jau sun en quest gremi.
Suenter mez favrer datti ina proxima surpraisa. Era il president communal da Glion sa retira da la suprastanza da la Sanasurselva.
Tge vulessan nus far en quella organisaziun nua che nus vegnin stuschads al chantun, nua che nus n'avain da dir nagut. Nus avain pliras giadas candidà per posts en gremis dal provediment da sanadad e là essan nus adina vegnids sclaus.
Las abdicaziuns dals dus presidents communals da la Foppa or da la suprastanza da la Sanasurselva ha procurà per fermas tensiuns politicas. Las renfatschas dals critichers èn augmentadas e la fidanza viceversa è svanida.
Elecziuns e studi
L'avrigl han ils delegads e las delegadas da la Sanasurselva gì da cumplettar la suprastanza. Cun l’elecziun da Clau Schlosser da Breil e Brigitte Berni da Val S. Pieder n'han las vischnancas da la Foppa gì nagin represchentant pli el gremi directiv da la Sanasurselva.
A chaschun da la sesida, ha la firma PwC infurmà pertutgant lur studi en connex co i pudess ir vinavant cun il spital regiunal da la Surselva. En quest studi han ils spezialists examinà set variantas pussaivlas. Or da quellas han ils spezialists preferì duas variantas:
- In spital ambulant (varianta 6)
- In spital cun letgs staziunars cun stritgar la partiziun da naschientscha, la partiziun d’uffants, la ginecologia staziunara e las operaziuns da notg (varianta 3)
Sco tar tut las ultimas sesidas hai era quella saira anc dà ina surpraisa. Il president dal cussegl d'administraziun da l'ospital, Thomas Buchli, ha annunzià sia demissiun. Sco successur è il medi Gieri Cathomas vegnì nominà.
Las midadas da persunal tar la Sanasurselva ed il Spital Regiunal da la Surselva han procurà ch'igl è daventa pli quiet il proxim temp e che la Sanasurselva ha pudì sa concentrar sin la dumonda co i duai ir vinavant cun l'ospital. Sin mez da l'onn vuleva la suprastanza laschar decider ils delegiads e delegadas co vinavant. Dentant è quest plan sa mussà sco memia ambizius.
En ina runda supplementara èn ils medis anc ina giada vegnids dumandads per lur opiniun. Quai ha la finala manà a la conclusiun da proponer a la radunanza da delegadas e delegads ina varianta ch’i na deva betg en il studi da la PwC. La suprastanza da la Sanasurselva ha proponì la varianta 3 cun adattaziuns. Factic era quai la varianta 1 da la PwC cun in ospital sco enfin ussa cun tut las purschidas actualas. Premissa per quella varianta fiss da chattar in medi d’uffants enfin la fin mars 2026. Uschiglio stuess la partiziun da naschientscha tuttina vegnir serrada.
Sin proposta da la delegada da la vischnanca da Glion han ils delegads decidì da prolungar il temp per la tschertga d’in medi d’uffants per trais mais e d’elavurar in concept d’urgenza per cas che la partiziun da naschientscha vegn serrada. Cun quella decisiun n’è il mument anc betg cler tge purschidas che l'ospital po ni sto porscher davent dal 2027.
Cun quai è in onn turbulent ì a fin per la Sanasurselva. Enfin ils 31.12.2026 è la cunvegna da prestaziun cun il Spital Regiunal anc valaivla. Sin ils 30.06.2026 sto la nova cunvegna che cumenza cun l’entschatta 2027 esser sin maisa per avair il temp necessari d’organisar il manaschi. Il temp per prender las decisiuns definitivas co vinavant cun il spital Regiunal da la Surselva vegn adina pli curt.