Suenter ch’il parlament communal da Trun ha tschentà pliras dumondas a las persunas preschentas da l’uniun Trun Cultura ed a la suprastanta responsabla Erica Cavegn ha in commember dal parlament fatg la proposta da cumplettar la donaziun dals daners cun trais cundiziuns.
- Il tetg accessibel da la Casa Carigiet duai esser fini sin la fin dal mais da favrer 2024.
- Il palancà da la Casa Carigiet, duai esser allontanà era sin la fin dal mais da favrer 2024.
- Ils daners contribuì da 100’000 francs duajan esser ina contribuziun unica vi da l’immobiglia Casa Carigiet.
La finala ha il cussegl communal giu da decider sch’els vulan las cundiziuns, quai ha el fatg quasi unanim, e la finala ha el votà sur da la donaziun cun las cundiziuns ed approvà la donaziun cleramain cun 10 encunter 4 vuschs.
Tge munta quai?
Per l’ina èn ils responsabels da l’uniun Trun Cultura cuntents che la vischnanca ha approvà la donaziun. Las duas primas cundiziuns vegnan els a pudair ademplir, la terza cundiziun deploreschan ils responsabels da Trun Cultura, dentant sajan els cuntents ch’il parlament haja approvà la summa giavischada, ha declerà suenter la sesida dal parlament Armin Niederberger il president da l’uniun Trun Cultura. Era ha el accentuà ch’il mument sajan els gia vida allontanar las restanzas dal palancà crudà ensemen mesemna ed il medem mument sajan els vi da sclerir cun ils lainaris co schliar la situaziun actuala senza tetg, ha declerà Armin Niederberger.
Era vischnanca è cuntenta
Per la suprastanta Erica Cavegn è il project impurtants per sa posiziunar en futur sco center cultural da la Surselva. Perquai saja quai da beneventar ch’il parlament ha concedì la contribuziun. Dentant deplorescha ella che quai ha stuì vegnir fatg cun cundiziuns. D’ina vart saja quai il signal giavischà da vulair sustegnair la cultura, da l’autra muntian las cundiziuns era ina tscherta sceptica cunter il project. Uss saja impurtant da cuntinuar e da mussar ch’ils projects vegnian propi era realisads e surtut che la Casa Carigiet survegn nova furma e nagin palancà e quai uschè spert sco pussaivel, accentuescha Erica Cavegn.
