Cun metter ad acta il cas, ha la procura publica er decis ch’ils apparats da cifrar ch’èn vegnids segirads vegnan returnads a l’interpresa.
La procedura vuleva sclerir sche persunas ord il conturn da la Crypto SA, han fatg la dumonda d’export per apparats da cifrar manipulads. Concret ha stuì vegnir sclerì sche quellas persunas han zuppà a moda sapientiva ils fatgs e sch'els han declerà aposta faussamain infurmaziuns impurtantas.
Suenter sias investigaziuns è la procura publica vegnida a la conclusiun, ch'i na dettia nagins indizis ch'insatgi haja cuntrafatg a moda sapientiva e betg legitima a la lescha. Las persunas che hajan gì da trametter ils apparats da cifrar, hajan stuì parter dal fatg che l'export saja legitim. Perquai haja la procura publica ordinà da metter ad acta il cas.
Scuvrì il favrer
L'affera da servetsch secret aveva cumenzà a marschar l'entschatta favrer. Retschertgas da la Rundschau da SRF en collavuraziun cun autras medias avevan mussà che la firma da Zug, la Crypto SA aveva vendì onns a la lunga apparats da cifrar manipulads a regenzas ed armadas. Manipulads eran ils apparats uschia ch'ils servetschs secrets dals Stadis Unids e da la Germania, la CIA ed il BND, han pudì decifrar quella communicaziun.
La fin favrer ha lura il Secretariat da stadi per economia, Seco purtà plant encunter nunenconuschent. Quai perquai ch'i saja vegnì cuntrafatg encunter la lescha d'export.
