La tschertga d'ina abitaziun en Svizra sumeglia savens la tschertga da la guglia en il fain – surtut sch'i va per la dumonda da la pajabladad. Saja quai per prender a fit u per cumprar: Datas che l'interpresa da cussegliaziun d'immobiglias IAZI ha evaluà exclusivamain per SRF mussan nua che Voss budget tanscha per in'abitaziun.
Per regla vala...
- Sche cumprar u prender a fit: Ordaifer ils centers è la tschertga d'abitaziun pli simpla cun in budget stretg.
- Cumprar vala la paina sin la champagna: En lieus decentrals è la chargia mensila per proprietad savens pli bassa ch'il fit.
- Prender a fit è savens pli favuraivel en la citad: En lieus fitg centrals e vischnancas turisticas è prender a fit marcantamain main char che cumprar.
Tant enavant las reglas generalas. Ma tge munta quai per Vus persunalmain? Il calculatur interactiv As respunda en trais pass las dumondas las pli impurtantas:
Schizunt sch'ins po sa prestar il fit usità al lieu u il pretsch da cumpra, na vul quai betg dir ch'ins chatta sin il martgà in'abitaziun adattada. La purschida è savens limitada. L'analisa da las datas mussa: L'emprim quartal dal 2026 èn en media be 0.6% da tut las abitaziuns da proprietad vegnidas scrittas ora per cumprar. Tar las abitaziuns affittadas èn almain vegnids scrits ora 2.4 % per dar a fit.
La disponibladad sin il martgà d'abitaziuns da proprietad è pli auta en la Svizra latina ch'en la Svizra tudestga. Abitaziuns da locaziun chattais Vus surtut en la Bassa ed il Giura.
«La situaziun è tendida»
«Igl è char per tuts», di Donato Sconamiglio, professer a l'Universitad da Berna, president dal cussegl d'administraziun da IAZI e cusseglier dal chantun Turitg (PEV). Cunzunt tar la proprietad vegnia l'offerta suenter la dumonda. «La situaziun actuala è fitg tendida. Famiglias giuvnas che vulessan gugent cumprar ina chasa siemian ditg, perquai ch'ils pretschs creschan ad in crescher.» En avantatg è tgi che na sto betg far midada: Proprietarias e proprietaris profiteschan d'ina valur creschenta da lur immobiglia, entant che la locaziun existenta da locatarias e locataris da blers onns resta stabila. Pli char vegni perencunter tar la midada.
