Gimnasis e scolas medias spezialisadas duain pudair desister d'examens finals, quai propona la Conferenza dals directurs chantunals da l'educziun EDK al Cussegl federal. Lez duai reglar la renunzia d'examens en dretg d'urgenza. Perquai che las scolas medias restan serradas fin ils 8 da zercladur, na possian intgins chantuns betg pli manar tras examens, argumentescha la conferenza. La radunanza plenara haja perquai decidì unilaterlamain da desister sin ils examens a bucca.
Notas d'experientscha duain valair
Entras las consequenzas da las scolas medias serradas, na vegnan betg tut ils chantuns tutgads tuttina. En intgins chantuns era la materia da scola gia quasi serrada giu avant il lockdown, en auters chantuns giaja quai per regla fin il mez da matg. Per quest motiv duain ils chantuns er pudair decider sezs, sch'ils examens a scrit vegnan medemamain desditgs. En ils chantuns che desistan dals examens a bucca ed a scrit duain las notas d'experientscha valair. Uschia saja garantida la qualitad e l'equivalenza dals attestats finals.
