Igl è sco sch'ins fiss sin viadi cun in abunament general (GA): Tuttina tge med da transport ch'ins dovra cura e nua – cun entrar na ston ins pensar vi da nagut pli. La differenza tar il GA: Ins na paja betg a moda pauschala, mabain mo per ils viadis che vegnan effectivamain fatgs.
Michaela Ruoss, da la federaziun interprofessiunala dal traffic public Alliance Swisspass, discurra d'in ulteriur pass innovativ vers in'utilisaziun anc pli simpla dal traffic public. «En connex cun questa tecnologia na ston las utilisadras ed ils utilisaders betg pli far patratgs pervia dal check-in avant che viagiar u pervia dal check-out suenter sortir dal tren, sco che quai ch'igl è oz il cas tar il ticketing automatic.»
«Hop-on, hop-off» enstagl da check-in e check-out
Cun «Be in – Be out» curt «Bibo» identifitgescha l'app sezza cura ch'ins sa chatta en il traffic public e calculescha il pretsch correspundent suenter il viadi. Ins ha pia automaticamain in bigliet valaivel. Quai vala natiralmain era tar la midada da tren.
Era la SBB beneventa il svilup dal bigliet digital. Perquai ch'il sistem da Easy Ride cun ils check-ins e check-outs manuals chaschuna adina puspè surpraisas malempernaivlas, per exempel sche viagiaturas e viagiaturs fan memia tard il check-in e vegnan chastiads tras quai. Il manader dal segment digital da la SBB, Parand Rohani, è perquai persvadì ch'ins po satisfar in basegn da la clientella cun il nov sistem Bibo.
Bibo e Venda – Grischun po duvrar tuts dus sistems
Il Grischun ha en intginas regiuns in agen sistem da bigliets cul num Venda. Tar quel pon ins pajar cun ina charta da la banca u cul Swiss Pass als automats correspondents.
Bibo è in sistem per persunas che vulan duvrar lur telefonin e vulan sa registrar. I dat dentant persunas che na vulan betg quai e là è Venda in bun sistem.
Tenor Renato Fasciati, il directur da la Viafier Retica saja Venda in bun sistem. En l'avegnir duessi dentant dar in u dus sistems che pon vegnir duvrads dapertut – uschia ch'ils custs restan bass. Il nov sistem Bibo che vegn era testà en Grischun na duess dentant betg remplazzar Venda.
Il material rudlant è gia pront
Tut il material rudlant da la SBB saja gia equipà cun las installaziuns da bluetooth ch'èn necessarias per identifitgar l'app, di Rohani. I sa tractia d'uschenumnads «beacons» – pia d'emetturs pitschens da signals. Excepziuns pertutgian tenor Alliance Swisspass sulettamain ils trens internaziunals sco TGV u ICE e paucs cas spezials.
Co ch'il sistem sa cumprova en la pratica vegn testà a partir da la fin d'avrigl en in project da pilot da dus mais cun var 3'000 utilisadras ed utilisaders dal traffic public. La SBB spetga uss ils resultats e vul suenter integrar il nov sistem en l'applicaziun mobila da la SBB, uschespert che dumondas avertas èn scleridas.
Era l'organisaziun da clients Pro Bahn beneventa Bibo – premess ch'i dettia vinavant alternativas. Uschia duain viagiaturas e viagiaturs anc adina pudair utilisar il sistem dad Easy Ride u cumprar bigliets al spurtegl respectivamain automats. Tenor la SBB resta quai garantì.
Co vesi or cun la protecziun da datas?
L'incumbensà federal per la protecziun da datas e per la transparenza na vesa nagins problems da princip en connex cun il nov sistem.
Il post da la Confederaziun annunzia sin dumonda ch'el saja en contact cun l'Alliance Swisspass en connex cun l'introducziun dal nov sistem. Ins accumpognia il project e persequiteschia cuntinuadamain il svilup da quel. La finamira è quella da cussegliar u daventar activ tenor il dretg da controlla en in mument strategic e relevant per il project.