Sin ils trutgs dal Parc Naziunal Svizzer èn levamain damain persunas stadas da viadi l'onn passà. Quai scriva il Parc Naziunal Svizzer en ses rapport dal 2024.
Tras las 11 staziuns da dumbrar sin il territori dal parc sajan passa 87’000 viandants e viandantas passadas. Quai sajan 1,5% pli paucs ch'il 2023.
In lev augment hai percunter dà tar il dumber d'entradas en il center da visitaders, sin lev sur 20'000 persunas. Er in plus ha il parc naziunal nudà tar las excursiuns guidadas cun pli che 5'200 participantas e participants.
La chamona Cluozza ha nudà in record da pernottaziuns cun 6'471 – quai è in plus da 4,5%. Quai munta che la chamona saja stada occupada per 78,6% – quai che saja unic per ina chamona, scriva il Parc Naziunal Svizzer en ses rapport. En tut hajan 8'260 persunas visità la chamona.
Triep dal Fuorn è vegnì eleminà
In tema central l'onn 2024 saja stà il triep dal Fuorn. Sia existenza è vegnida messa en dumonda pervia da stgarps da muvels. Malgrà ina lubientscha da sajettar entras la Confederaziun ha il parc naziunal accentuà la coexistenza tranter uman e luf. La cumissiun da perscrutaziun dal parc è s'engaschada intensivamain per la chapientscha da la rolla ecologica da lufs ed auters animals da rapina en l'ecosistem.
En il territori dal Fuorn è sa furmà en il decurs da l'onn 2023 in triep da lufs ch'ha consistì dal pèr dals geniturs (F98 e M312) sco er 8 animals giuvens che sajan tuts vegnids identifitgads geneticamain l'entschatta da l'onn 2024. La stad è il pèrin puspè returnà en il territori ed ils guardians dal parc han lura danovamain constatà 7 luffins. La fin da l'onn ha il chantun communitgà ch'el haja sajettà 14 lufs en territoris ordaifer dal parc. Quels tutgan tenor il chantun tuts al triep dal Fuorn.
Onn da scuvertas scientificas
Il 2024 saja plinavant stà in onn da las scuvertas scientificas. Passa 70 projects da perscruttaziun sajan vegnids realisads, tranter auter er studis davart la biodiversitad e las consequenzas da la midada dal clima. In highlight saja stà la preparaziun d'ina publicaziun d'in cudesch davart il tema da la midada da la cuntrada che documentescha las midadas en il parc sur 111 ons. Ultra da quai è vegnì modernisà cumplessivamain l'infrastructura da geodatas per sustegnair er vinavant la lavur scientifica.
Pli chaud onn dapi l'entschatta da las mesiraziuns
L'onn 2024 saja stà spezialmain chaud en il Parc Naziunal Svizzer cun blera plievgia e naiv. I saja stà il pli chaud onn dapi l'entschatta da las mesiraziuns il 1917 ed uschia surpassà l'onn avant per 0,1 grads. La staziun meteorologica Buffalora ha mesirà ina temperatura media da 2,4 grads – quai che saja 1,3 grads sur la norma sur plirs onns (1991-2020).
Sustegn finanzial
Il parc naziunal ha survegnì sustegn finanzial da differentas funtaunas dal public e privatas, tranter auter da la Confederaziun, dal chantun e da la Pro Natura. En tut munta il retgav da gestiun a passa 6'300'000 francs cun in resultat annual da passa 815'000 francs.
Or da l'archiv: