Siglir tar il cuntegn

Header

Navigaziun

Sala dal cussegl naziunal
Legenda: Keystone
cuntegn

Sessiun da stad Luf, castur, chauma da dunnas, congedi da babs e pesticids

In sguard enavos sin la sessiun da stad: Il castur ha dumagnà da scappar, il luf betg. Il Cussegl federal vegn sut las rodas. En il cumbat cunter pesticids ed antibiotics spera il cussegl naziunal sin la voluntad da puras e purs. Ils babs duessan far dapli vacanzas e la chauma dunnas mussa effect.

Il castur è scappà cun in egl blau

Tar quest affar datti anc differenzas, malgrà ch'i ha gia dà en las chombras numerusas debattas. Per exempel tge che pertutga la renconuschientscha da las patentas da chatscha. Il Cussegl naziunal vul che las patentas vegnan renconuschidas vicendaivlamain dals chantuns – il Cussegl dals chantuns è però cunter.

Ma en in punct central èn las duas chombras vegnidas perina: Il luf duai pudair vegnir reglà pli simpel. El duai pudair vegnir decimà sch'ins ha l'impressiun che quels pudessan eventual far in donn. Il castur sco era il luf-tscherver èn entant rivads da scappar da la glista dad animals protegids che duain pudair vegnir schluppettads pli simpel.

Organisaziuns da la natira e da l’ambient han però gia annunzià ch'els vegnian a far il referendum. Uschia n'è la discussiun «lescha da chatscha» anc ditg betg finida.

La chauma da dunnas fa effect

En il Cussegl dals chantuns cun 87% umens e 13% dunnas, è vegnì decidì areguard la revisiun dal dretg d'aczias che dapliras dunnas duessan esser a la testa dad interpresas. Concret è vegnì decidì ch’en cussegls d'administraziun dad interpresas grondas duai in gener esser represchentà almain cun 30% ed en la direcziun da firmas almain cun 20%.

Tenor diversas politicras e politichers u era tenor commentaris en gasettas è questa decisiun in emprim success da la chauma da dunnas. Il squitsch da la chauma haja gì effect, cunquai che la cumissiun dal cussegl dals chantuns ha en sasez decidì da refusar las uschenumnadas valurs directivas per las schlattainas.

Dapli vacanzas per babs

Dapli egualitad duai era valair per babs, dian organisaziuns dad umens e da dunnas, sco era travail.suisse, l’organisaziun da lavurantas e lavurants ch'han lantschà l'iniziativa per in congedi da paternitad raschunaivel. Els vulan prescriver che babs survegnan in congedi da paternitad da quatter emnas. Oz han babs in dretg d'in congedi dad in di cura che il poppin nascha. Quatter emnas pareva però a la gronda part dal Cussegl dals chantuns memia bler e perquai ha la chombra pitschna decis en furma d'ina cuntraproposta indirecta ch’i duai dar duas emnas. Ussa sto anc il cussegl naziunal debattar avant ch’il suveran svizzer po decider a l'urna.

Confidenza en voluntad da pauras e paurs

Pesticids ed antibiotica en mangiativas u en l'aua è ina tematica che preoccupescha. Quai è er sa mussà en la debatta dal cussegl naziunal davart las duas iniziativas ecologicas. I ha era dà ina lunga debatta cun votums per part fitg agitads.

Concret vai per duas iniziativas che vulan reducir ils pesticids e l'antibiotica en l'agricultura. Per il Cussegl naziunal èn las iniziativas però memia radicalas. Per exempel na duain puras e purs na survegnir naginas subvenziuns sch'i dovran pesticids sintetics.

Differentas cuntrapropostas eran en la cursa, ma quellas n’han gì nagina schanza causa in’allianza da las partidas burgaisas. Quels speran sin il saun giudizi da puras e purs cunquai ch'il diever è gia ì enavos ils ultims onns. La pazienza dals partids ecologics va però planet a fin. Tant pli gronda è la dischillusiun tar las partidas da la sanestra ch’ina cuntraproposta indirecta – che fiss stada pensada sco cumpromiss – è vegnida refusada.

RR actualitad 12:00