La Spagna è per la segunda giada campiun mundial suenter il 2010. «La Furia Roja» dal trenader Luis De la Fuente ha gudagnà il final cunter l'Argentina decimada cun 1:0 suenter prolungaziun.
La Spagna ha gudagnà merità. Durant l'entir gieu han ils Spagnols pudì sajettar 12 giadas sin il gol argentin. Ils Argentins n'han però betg gì in singul sajet sin il gol Spagnol. Cartas ha l'Argentina incassà 5 melnas ed ina cotschna – la Spagna nagina. Era remartgabel: La Spagna ha durant l'entir turnier dal campiunadi mundial incassà in sulet gol.
Themen in diesem Newsticker
- La Spagna è campiun mundial 2026
- Emprim gol suenter 106' — Ferran Torres tutga la rait argentina
- Argentina gioga mo en 10 en la prolungaziun — 0:0
- Senza gols en la pausa — 0:0
- Tgi daventa campiun mundial 2026?
- Mbappé cun ils blers gols – almain per il mument
- Engalterra gudogna gieu per terz plaz cunter Frantscha cun 6:4
- Spagna cunter Argentina – in duel dal cor
- Manzambi mida tar Aston Villa
- Argentina batta Engalterra 2:1 e cuntanscha final
Uschè grond sco anc mai e nov modus
Igl è stà in campiunadi mundial da la superlativa – per l'emprima giada èn sa participads 48 teams. Quai n'hai anc mai dà. Quai ha gì per consequenza ch'il dumber dals gieus è s'augmentà a 104. Perquai ha il turnier era durà pli ditg che las ediziuns passadas - dal gieu d'avertura tranter il Mexico e l'Africa dal Sid ils 11 da zercladur, enfin il final dals 19 da fanadur a New Jersey – passa 5 emnas.
Cun 48 naziuns participantas ha la Fifa er stuì midar il modus. Da las 12 gruppas da la fasa da gruppas èn vegnids vinavant mintgamai l'emprim da la gruppa ed il segund da la gruppa. Vitiers èn vegnids ils 8 megliers terzs da la gruppa. Quels 32 teams han giugà ils 1/16-finals. Era questa runda è stada in novum a campiunadis mundials da ballape.
Ballape mo durant la notg? Gea.
Perquai ch'il turnier ha gì lieu en trais pajais ed en differentas zonas da temp, han cumenzà las partidas da differents temps. Ils fans europeics dal ballape han stuì sa preparar sin intginas uras senza sien. La buna novitad ord vista svizra è stada: tut ils trais gieus da gruppa da la naziunala han gì lieu a las 21:00 temp svizzer. Pir durant la fasa da K.o. hai dà in gieu ch'ha cumenzà las 05:00 temp svizzer.
Urari da las partidas
Sper las uras nocturnas èn stads novs era ils uschenumnads «hydration breaks». Durant tuttas duas mitads hai dà ina pausa da baiver da trais minutas sco protecziun dals giugaders da la chalira. Ultra da quai è quella pausa era stada buna per purschiders da televisiun per vender ed emetter dapli reclama. Plinavant è l'aura stada in tema: Gia tar il campiunadi mundial dals clubs la stad passada eran partidas vegnidas interruttas per part per pli ditg.
E tge fa la squadra naziunala? Quartfinal.
La squadra naziunala da la Svizra è viagiada l'entschatta da zercladur en ils Stadis Unids da l'America. Pli precis a San Diego, nua ch'il team è stà durant il turnier. Per la Svizra è il campiunadi mundial però stà a fin suenter il quartfinal. Ils Svizzers han pers cunter l’Argentina cun 1:3 suenter prolungaziun. Ils Argentins eran ids en avantatg en la 10avla minuta tras in gol Mac Allister. En la 67avla minuta ha Ndoye egualisà per la Svizra. A partir da la 72avla minuta han ils Svizzers stuì agir cun in um damain sin il plaz, suenter ch’Embolo aveva survegnì la carta mellen-cotschna. En la prolungaziun han Álvarez e Martinez procurà per la decisiun.
Ed ils favurits? In da quels ha gudagnà.
L'Argentina è partida sco defensura dal titel ed è arrivada enfin il final. L'ulteriura top-favurit Frantscha è vegnida en il pitschen final ed ha là pers cunter l'Engalterra. Il confavurit Spagna ha la finala gudagnà ed è ida per sia segunda staila sin il tenue.