Engadin Skimarathon 2026 - La pli gronda occurrenza da sport popular – il 56avel maraton

Concurrenza: Participai ussa & gudagnai ina plazza da partenza!

Cumplettai simplamain il formular e cun in pau cletg participais Vus al 56avel maraton da skis engiadinais. Ensemen cun var 14'000 participants e participantas da passa 60 naziuns sin il traject da 42 km da Malögia a S-chanf.

Emna da maraton: In cursa adattada per mintgin e mintgina

Sper il maraton da skis engiadinais stattan mintgamai il mez maraton engiadinais, la cursa da dunnas engiadinaisa, la cursa da notg engiadinaisa sco er in sprint da giuvenils sin il program.

• 25 da favrer 2026, sprint da giuvenils: La cursa da sprint dat als uffants ed als giuvenils la pussaivladad da far ina cursa en furma da concurrenza. Mintgamai la mesemna avant la cursa da dunnas engiadinaisa cumenza quai a las 14:00.
• 1. da mars 2026, cursa da dunnas: Tar la cursa da dunnas stattan las dunnas en il center e giaudan lur cursa. Per la 25avla giada curran las participantas la distanza da 17 km da Samedan a S-chanf. Cun il project «Go 4 cursa da dunnas» pon las dunnas plinavant prender sut ils skis la distanza en equipas da quatter.
• 5 da mars 2026, cursa da notg: La gievgia saira ha lieu l'8avla cursa da notg. A las 19:00 croda il culp da partenza e las participantas sa mettan sin la distanza da 17 km da Segl a Puntraschigna. Tar il quart punct dal program da l'emna da maraton giaudan ins in'atmosfera speziala e romantica. Il cler da glina e las lampas da frunt mussan als curriders la via.
• 8 da mars 2026, mez maraton e maraton: Tgi che na sa fida betg da far ils 42 kilometers po er participar al mez maraton sur 20 kilometers. La partenza ha lieu a Malögia ensemen cun ils curriders dal maraton. Entant che las curridras dal mez maraton han cuntanschì la finamira a Puntraschigna, vala per las participantas dal maraton da tegnair ora fin a S-chanf.

Maraton da skis engiadinais 2025

Istorgias, infurmaziuns da basa, resultats, novitads ed intervistas – RTR era er il 2025 sin plazza e rapportava live. Qua chattais Vus tut davart il maraton da skis engiadinais.

ESM 2025

Istorgia dal maraton da skis engiadinais

L'«Engiadinais» è l'occurrenza da passlung la pli gronda da la Svizra e la segund pli gronda dal mund. Dapi il 1969 curran millis da participants e participantas la segunda dumengia da mars la distanza da maraton da Malögia fin S-chanf. Gia il 1976 ha il dumber da participantas surpassà per l'emprima giada il cunfin da 10'000. Oz sa participeschan mintg'onn var 14'000 participants da passa 60 naziuns a l'eveniment da passlung en l'Engiadin'Ota. Tar la 50avla ediziun l'onn 2018 ha l'annunzia stuì vegnir serrada per l'emprima giada en l'istorgia suenter 14'200 participantas.

RTR Sport

Avrir la box Serrar la box

Tut las istorgias da sport chattais Vus qua.

Tut ils videos da sport chattais Vus qua.