La davosa cursa da la cuppa mundiala en questa stagiun a Mont-Sainte-Anne ha anc ina giada procurà per gronda tensiun. Nino Schurter è parti en questa cursa cun in avantatg da 62 puncts sin il Franzos Jordan Sarrou. En la cursa n’ha dentant betg Sarrou, mabain Mathias Flückiger fatg tremblar il Lumnezian. Flückiger, partì cun 172 puncts dischavantatg sin Schurter, è ditg stà a la testa da la cursa durant che Nino Schurter n’è insumma betg vegnì sin turas en las emprimas trais da sis rundas.
Flückiger vegn franà entras duas plattas
Durant che Nino Schurter ha gudagnà posiziun per posiziun ha Mathias Flückiger gì duas giadas discletg. Il Bernais ha gì duas giadas ina platta tar la roda davos ed uschia stuì laschar surpassar il campiun olimpic e campiun mundial Tom Pidcock. Il Brit ha la finala gudagnà la cursa cun in avantatg da 26 secundas sin Mathias Flückiger. Nino Schurter ha cuntanschì l’arrivada, quai suenter intgins problems cun la chadaina en la davosa runda, sco 14avel cun in retard da 3:48 minutas sin Pidcock. L’auter concurrent en il classament general, il Franzos Jordan Sarrou è vegnì 9avel suenter in defect tecnic gia en l’emprima runda. Uschia ha Nino Schurter pudì defender ses emprim plaz en il classament general e gudagnar per la 9avla giada en sia carriera la cuppa mundiala generala da cross-country – in record.
Grondiusa prestaziun svizra en il Canada
Cun Marcel Guerrini ha anc in segund svizzer pudì far il pass sin il podest. Il mountainbiker dal chantun Son Gagl è vegnì terz ed ha uschia suttastritgà sia grondiusa furma. Igl è il segund plaz da podest en seria ed en sia carriera suenter il terz plaz avant in’emna a Snowshoe en ils Stadis Unids. E gia en la cursa avant a Les Gets en Frantscha aveva Guerrini persvadì sco quart. Persvadì a Mont-Sainte-Anne ha er Thomas Litscher sco 5avel. Plinavant è Lars Forster vegnì davos Nino Schurter 15avel. Filippo Colombo, il Tessinais e collega d’equipa da Schurter, ha terminà la stagiun cun in 17avel plaz. E gist anc cuntanschì in plaz sut ils top 20 a Canada, quai sco 20avel, ha Vital Albin da Tersnaus. El ha pers 5:05 minutas sin il victur Tom Pidcock.
Schurter engrondescha ses agen record
Cun gudagnar per la 9avla giada il classament general da la cuppa mundiala ha Nino Schurter ina giada dapli demonstrà ch’el è il meglier mountainbiker da l’istorgia. Il Lumnezian era gia stà durant las stagiuns 2010, 2012, 2013, 2015, 2017, 2018, 2019 e 2022 il meglier mountainbiker da l’onn. Cun 9 triumfs ha el uss dus dapli che ses anteriur rival franzos Julien Absalon. En la stagiun 2023 ha el la finala gudagnà quest classament general cun sulet 40 puncts avantatg sin il Franzos Jordan Sarrou. Terz cun in dischavantatg da be 50 puncts suonda Mathias Flückiger ch'aveva gudagnà il classament general da la cuppa mundiala il 2021.
Victoria istorica a Lai
Nino Schurter po mirar enavos sin ina grondiusa stagiun. Per il punct culminant ha el procurà il zercladur a Lai. A sia cursa da chasa ha el festivà sia 34avla victoria da la carriera en la cuppa mundiala ed uschia battì il record da Julien Absalon. Strusch in mais pli tard ha Schurter er anc gudagnà la cursa da la cuppa mundiala a Val di Sole en l’Italia. Tut en tut è Schurter stà tschintg giadas sin il podest en las otg cursas da la cuppa mundiala en questa stagiun. Plinavant ha il Lumnezian gudagnà als campiunadis mundials a Glasgow en la Scozia la medaglia da bronz en la cursa roiala da cross-country ed aur en la cursa da staffetta, il Team Relay.
Jolanda Neff manchenta il podest
Tar las dunnas eri gia cler avant la davosa cursa da la stagiun a Mont-Sainte-Anne che Puck Pieterse gudogni il classament general da la cuppa mundiala 2023. En la davosa cursa è la giuvna Ollandaisa la finala vegnida terza ed ha uschia anc ina giada suttastritgà sia buna stagiun. Gudagnà en il Canada ha la Franzosa Loana Lecomte cun in avantatg da 15 secundas avant la Svedaisa Jenny Rissveds.
Da las Svizras ha oravant tut Jolanda Neff persvadì. La campiunessa olimpica da Tokyo è vegnida quarta ed ha manchentà be per 15 secundas ses emprim plaz da podest en questa stagiun. Cun Alessandra Keller sco 8avla, Sina Frei sco 9avla e Nicole Koller sco 10avla han anc trais ulteriuras svizras cuntanschì in plaz sut las top 10.
Svizras cun ina stagiun mediocra
Auter che tar ils umens n’è la stagiun 2023 betg ida sco giavischà a las dunnas svizras. Dus onns suenter il triumf total als gieus olimpics a Tokyo cun aur per Neff, argient per Frei e bronz per Linda Indergand han las Svizras cuntanschì la davosa stagiun be dus plazs da podest, omaduas giadas entras Alessandra Keller. A Lai è la mountainbikera dal chantun Sutsilvania vegnida terza ed a Vallnord segunda. En il classament general è Keller classada sco meglra svizra sin il 5avel plaz. Gudagnà quest classament general da la cuppa mundiala ha Puck Pieterse avant Loana Lecomte e l’Austriaca Mona Mitterwallner.
Il 2024 spetga ina stagiun superlativa
L’onn proxim spetga sin ils mountainbikers ina stagiun cun divers puncts culminants. Il pli grond èn ils gieus olimpics a Paris. En l’Andorra spetgan ils proxims campiunadis mundials ed a Crans-Montana pon ils Svizzers danovamain sa legrar sin ina cursa avant ils fans da chasa. Las cursas en il Vallais valan sco l’emprova generala per ils campiunadis mundials il 2025.
