Suenter las duas cursas da la cuppa mundiala da mountainbike l'avrigl ad Araxá en la Brasilia spetga questa fin d’emna l’emprima cursa en l’Europa, quai a Nové Mesto en la Tschechia. Questa cursa vala sco in dals gronds classichers da cross country. Cun grond optimissem vegn franc Nino Schurter ad ir a la partenza. Il mountainbiker da Tersnaus ha numnadamain triumfà gist otg giadas sin quest percurs ed è uschia il victur da record a Nové Mesto.
Premiera per Alessandro Solèr
Per l’emprima giada insumma dastga Alessandro Solèr parter ad ina cursa da la cuppa mundiala. Il giuven mountainbiker da 16 onns da Lumbrein ha survegnì in plaz en l’equipa Pasolino Racing da Winterthur. Uschia dastga el fufragnar ina giada en il mund dals gronds. Per tips e trics po el dumandar la sora Chiara ch’ha gia dastgà parter avant dus onns a Nové Mesto. Per Chiara Solér (20) èsi l’emprima cursa da la cuppa mundiala da quest onn. Durant ch’ella parta en la categoria da las U23 va il frar Alessandro a la partenza cun ils juniors.
Il mardi saira, durant ch’il bab Beat ha preparà en garascha ils mountainbikes dal figl e la figlia, han Chiara ed Alessandro, cun agid da la mamma Carla, pachetà lur valischas. La mesemna en damaun han els lura fatg il viadi cun bus vers la Tschechia. Da Lumbrein fin Nové Mesto cuzza il viadi bun 10 uras.
In emprim punct culminant
Las cursas da la cuppa mundiala a Nové Mesto èn in dals emprims puncts culminants en questa stagiun. L’entschatta fanadur vulan lura tant Chiara sco er Alessandro far furora al campiunadi svizzer ch’è quest onn a Savognin, pia quasi avant chasa. Cun bunas prestaziuns emprovan ils Lumnezians lura er da sa qualifitgar per il campiunadi mundial il settember a Crans-Montana. E be in’emna pli tard, dals 19 fin 21 da settember spetgan las cursas da la cuppa mundiala a Lai.
