Swiss Cycling ha nominà 8 Grischunas e Grischuns per ils campiunadis mundials da ciclissem l’avust en Scozia. Dasper ils dus mountainbikers d’elita oriunds da Tersnaus, Nino Schurter e Vital Albin, èn quai Ginia Caluori da Panaduz e Janis Baumann dad Igis che partan en la categoria da cross-country dals U23. En la categoria da las junioras e juniors sut 19 onns van là a la partenza Anina Hutter da Trimmis, Chiara Solèr da Lumbrein e Mauro Hassler da Cuira. Er vegnì nominà per quest campiunadi mundial è Elena Hartmann, la ciclista da Domat che abitescha dentant a Baar en il chantun Zug. Ella parta en la cursa da via sco er en la cursa cunter l’ura.
Campiunadis mundials gigantics
Tut en tut pon passa 130 atletas ed atlets svizzers far il viadi a Glasgow a quests emprims campiunadis mundials cumbinads cun tut las spartas da velo. I vegn cumbattì dals 3 enfin ils 13 d’avust per passa 200 sets da medaglia, quai en las disciplinas da mountainbike, velo da via, velo sin pista, BMX Freestyle, BMX Racing, Gran Fondo, Indoor Cycling, Trial e Para-Cycling. Uschia èn represchentads, cun excepziun dal ciclissem champester, tut ils sports da velo ch’èn suttamess a l’Uniun da ciclissem internaziunala UCI.
Nino Schurter va a la partenza sco defensur dal titel en la cursa da cross-country. Avant in onn aveva il mountainbiker da 37 onns festivà a Les Gets en Frantscha ses 10avel titel da campiun mundial. Sche Schurter sco era Vital Albin partan era en las cursas da short track n’è anc betg decidì.
