Il tun da la vusch da la mamma u dal bab en l’ureglia – quai è per uffants, en il meglier cas, ina da las pli bellas melodias dal mund. Sch’i avess però da capitar insatge als geniturs, ristga il sun da questa melodia da sblatgir pulit svelt, cunzunt sch’ils uffants èn anc giuvens.
Il stgazi auditiv - in regal che surviva la mort
Grazia a l’idea «Hörschatz» duain la vusch dals geniturs era resunar suenter lur mort. «Hörschatz» è in'audiobiografia. Sch’in genitur d'uffants minorens ha da murir po el uschia laschar enavos betg be ina collecziun da las istorgias che stevan a cor, mabain era istorgias raquintadas cun l'atgna vusch.
In «Hörschatz» è sco in cudesch da vita persunal, ma en furma d'audio. Geniturs, ch'èn malsauns senza speranza sin megliurament, pon registrar messadis, istorgias e chanzuns per lur uffants pitschens.
L'audiobiografia è partida en plirs chapitels curts. Ella porscha spazi per parter anecdotas, experientschas, chanzuns preferidas, recepts, ditgas, savida e messadis persunals d'amur. Uschia pon geniturs raquintar lur istorgia da vita cun agens pleds.
La registraziun finida vegn dada a las famiglias sin ina clavetta USB en furma d'in cor, l'uschenumnà «Hörschatz-Herz», che sa chatta en ina pitschna stgatla da stgazis.
In’audiobiografia – tgirada cun premura e professiunalitad
Da pussibilitar precis quest'experientscha, ch’i dat gia en la Germania, er en Svizra ad uschè blers uffants sco pussibel è dapi sis onn era l’intent da l’Uniun «Hörschatz». Fundada è quest'uniun vegnida da las schurnalistas Franziska von Grünigen e Gabriela Meissner.
Las duas fundaturas, Franziska von Grünigen e Gabriela Meissner, vegnan sustegnidas d'in team da voluntaris che contribueschan lur savida da differents champs. Tranter auter vegnan ils voluntaris sco audiobiografs ed audiobiografas tar ils geniturs, ch’èn sin murir, e registreschan tut quai ch’els vulan raquintar a lur uffants. Igl è in process che po era gidar als geniturs da s'occupar cun l'atgna istorgia da vita e da vegnir a frida cun lur destin.
Experientschas d'ina audiobiografa: Prisca Bigliel raquinta
Cun quai ch’i dat adina pli e pli grond interess per talas registraziuns, han las fundaturas dal «Hörschatz» tschertgà nov sustegn per far quella lavur. Ina d'ellas è Prisca Bigliel, ch'è pertscherta da la forza da la vusch, grazia a sia lunga experientscha tar RTR:
Ina da las fundaturas che producescha quest «Hörschatz» di er adina che la vusch è sco la DNA da l'olma.
Cura ch’ella è vegnida contactada saja stà cler per ella da dir Gea e contribuir al «Hörschatz». I saja ina lavur che fetschia senn ed in sustegn per famiglias en situaziuns existenzialas.
Jau pens che sch'ins sa confruntescha cun quests temas, lura survegn era la vita tut in'autra valur. Damai sch'ins sclauda la mort, lura na san ins sez betg tge ch'ins ha vi da la vita.
Enfin uss ha ella gì dus inscunters fitg differents. In n’ha la finala betg manà ad in «Hörschatz» perquai che la malsogna era gia avanzada memia fitg. Da l’auter inscunter dettia 20 uras plain istorgias e regurdanzas d'ina mamma per ses dus uffants pitschens.
Per pudair retschaiver in stgazi auditiv ston tscherts criteris esser ademplids: I sto esser ina malsogna en in stadi avanzà che scursanescha la vita ed uffants minorens ston esser involvads.
Ultra da quai èsi necessari d'esser pront da sa participar ad in project da perscrutaziun da l'Universitad da Turitg (Center da cumpetenza Palliative Care).