La regenza grischuna ha surdà il Premi grischun da cultura 2026 a l'artista Katharina Vonow. Cun il premi undreschia la regenza la vita e l' ovra ritga da l’artista da Rodels, hai num en ina communicaziun. Il premi è dotà cun 30'000 francs. Katharina Vonow è cunzunt enconuschenta sco fotografa e fotoreporta. Plinavant haja ella er malegià, dissegnà ed instruì.
La via cumenza baud
L'atmosfera d'in atelier d'art emprenda Katharina Vonow ad enconuscher gia sco uffant, cura ch'ella sesa model d'ina pictura amia. Era sch'ella sa regorda pli tard strusch da la pictura sezza, sveglia l'odur da colur d'ieli puspè sia memoria da questa atmosfera intgantanta d'in atelier d'art.
Creschida si è Katharina Vonow en ina famiglia fitg creativa. La mamma era graficra, il bab fotograf ed er ella ha lura cumenzà baud cun la fotografia. Cun 11 onns ha ella survegnì sia emprima camera, dapi lura haja ella adina fotografà, di l'artista oz.
In'invista en l'ovra fotografica da Katharina Vonow
-
Bild 1 von 7. Bildquelle: Katharina Vonow.
-
Bild 2 von 7. Bildquelle: Katharina Vonow.
-
Bild 3 von 7. Bildquelle: Katharina Vonow.
-
Bild 4 von 7. Bildquelle: Katharina Vonow.
-
Bild 5 von 7. Bildquelle: Katharina Vonow.
-
Bild 6 von 7. Bildquelle: Katharina Vonow.
-
Bild 7 von 7. Bildquelle: Katharina Vonow.
Vonow ha absolvì in emprendissadi da fotografa en la fatschenta da ses bab a Cuira. Ma Katharina Vonow siemia pli grond:
Atgnamain vulev jau adina esser mo artista, ma jau n'hai dentant betg ristgà da formular quest giavisch.
Ma quest siemi vegn ella a realisar mo pauc pli tard. Suenter il giarsunadi va ella bainprest or en il mund. Vonow fotografescha per la NZZ, il magazin dal Tages-Anzeiger, sgola per reportaschas a Londra, Paris e New York.
Oz abita Katharina Vonow a Rodels e giauda la vita. Ella saja ozendi paschaivla e ed il pli bain plaschia da passentar temp en las muntognas grischunas. L'artista ha chattà ses pitschen paradis en la Tumleastga.
Ina vita plain aventuras ed inspiraziun
Ella saja ina aventuriera ed ella haja gì adina gugent la glieud. Uschia saja ella adina er stada avantgardistica ed ina tscherta pioniera, oravant a ses temp.
Sias fotografias èn umoristicas, punctuadas e nunschenadas. En la seria «triangul feminin» dumonda ella il 1987 sias amias en l'atelier da fotografar sias «collinas da venus». I sa resulta ina seria da 51 «trianguls feminins» che vesan or sin l'emprima l'egliada sco vaiders da coctail. Era cun la seria «sexualitad d'impedids», ch'ella ha realisà il 1997, è ella oravant a ses temp.
Premis per ulteriuras persunas e projects
Sper il premi principal ha surdà la regenza ulteriurs otg premis da renconuschientscha e tschintg premis da promoziun da mintgamai 20'000 francs.