(sursilvan) Questa dumengia ha liug a Cuera l’avertura digl onn digl uestgiu. Cun quei onn particular vul nies uestg Joseph Maria promover la cuminonza. Ei duei dar ina fiasta che lai sentir il plascher dalla cardientscha, dalla speronza digl esser communablamein sin via sco pievel da Diu.
Jeu selegrel da prender part a quei di. Mo aunc pli fetg selegrel jeu da semetter sin via viers Cuera. Quei fetsch jeu per quei di buca sco usitau cul tren ni cugl auto, mobein a pei. En cumpignia d’ina gruppa da trenta persunas pelegrinein nus en dus dis da Glion entochen Cuera. Star sur notg astgein nus tier parochianas e parochians da Domat.
Ina buna definiziun para a mi quella ch’il pelegrinar seigi viagiar + (plus). Il plus signiffichescha la dimensiun spirituala. Tier il pelegrinar stat buca la prestaziun corporala ni l’aventura el center, mobein igl esser sapientivamein sin via cun Diu.
Pelegrinar! Pils ins freda il plaid bravamein da baselgia e da temps vargai. Per auters munta il pelegrinar in’aventura. Tgi ch’ei inaga pelegrinaus sin la via da s. Giachen ni sin in’autra ruta da pelegrins bein frequentada, sa, ch’ei dat tons motivs da semetter sin via, sco quei ch’ei dat viandonts.
Jeu drovel sappientivamein il plaid viandont, pertgei buca mintgina e mintgin che camina sin ina via da pelegrinadi ei veramein in pelegrin. Mo co selai far cheu la differenza?
Ina buna definiziun para a mi quella ch’il pelegrinar seigi viagiar + (plus). Il plus significhescha la dimensiun spirituala. Tier il pelegrinar stat buca la prestaziun corporala ni l’aventura el center, mobein igl esser sapientivamein sin via cun Diu. Il plus sa esser motivaus tier mintga pelegrin empau auter. En temps nua ch’in pelegrinadi vegneva oravontut frequentaus per contonscher perdun, semussava quei plus bein savens sco ina crusch, che astgava senz’auter pesar sil dies dil pelegrin.
Ozildi schai il motiv forsa plitost el sefar libers dalla crusch dil mintgadi, el basegns da prender peda per sesez, egl anflar sesez ni era semplamein el plascher da scuvierer ils fastitgs da Diu el mund. Pelegrinas e pelegrins raquentan savens, ch’era il sereducir sin in minimum da material, il viver sempel, seigi ina buna experientscha: Viver ord il sacados che cuntegn sulettamein il pli necessari, decider denter quei ch’ins drova e quei ch’ei ballast, sentir la peisa dil possess. Ponderaziuns che prendan meinsvart era influenza sin il pelegrin che tuorna a casa e che metta en damonda il mund materialistic che dictescha nossa veta.
Jeu selegrel sin nies pign pelegrinadi enviers Cuera. Jeu selegrel sil plus che vegn quei di segiramein era formaus entras quellas e quels ch’ein cun mei sin via. E forsa entaupel jeu era Vus?