Siglir tar il cuntegn

Header

cuntegn

Survista da vischnancas Elecziuns e revisiuns

Diversas vischnancas han d'eleger lur gremis communals ed autras han da reveder parzialmain lur planisaziuns localas. Qua datti ina survista. Quella vegn adina puspè actualisada.

  • vopna Samedan
    Legenda: Samedan RTR

    Samedan

    A Samedan vegn tschertgà ina successura u in successur da Jon Fadri Huder sco president communal. Franziska Preisig (PS) e Gian Peter Niggli (PLD) candideschan per il post. Vitiers èsi er d'eleger ils commembers da la suprastanza communala. Per ils sis sezs datti otg candidatas e candidats, quatter anteriurs e quatter novs.

  • vopna Puntraschigna
    Legenda: Puntraschigna RTR

    Puntraschigna

    Votantas e votants da Puntraschigna ston eleger in nov presidi communal suenter che Martin Aebli sa retira suenter 16 onns en uffizi. Per sia successiun candideschan Nora Saratz Cazin e Gian-Franco Gotsch. En tut ha il suveran dad occupar otg posts vacants per la perioda d'uffizi 2021 fin il 2024. Previs eran las elecziuns a la radunanza communala dals 27 da november. Pervi da las restricziuns dal coronavirus vegn elegì a l'urna. Plinavant decidan ils da Puntraschigna davart ina nova cunvegna da prestaziun tranter la vischnanca e scola da musica Engiadin'Ota.

  • Vopna da Tavau
    Legenda: Tavau RTR

    Tavau

    Tavau elegia en in segund scrutini ses nov president communal, il landamma. I dat anc dus candidats per il post: Philipp Wilhelm (PS) e Peter Engler (PLD). Quai suenter che Valérie Favre Accola (PPS) ha decidì da betg pli candidar. Sper l'elecziun dal landamma decida il suveran da Tavau d'ina taglia da plivalur pli bassa tar enzonaziuns cun interess public spezial e da dar a las pendicularas Rinerhorn il dretg da pudair far diever da l'aua dal Rieberbach e dal Leidbach.

  • vopna San Murezzan
    Legenda: San Murezzan RTR

    San Murezzan

    San Murezzan vul reveder cumplettamain sia constituziun communala da l'onn 1978. L'ultima giada è quella vegnida revedida parzialmain il 1997. La revisiun totala cuntegna sulet anc l'urden fundamental da la vischnanca. Determinaziuns pli pauc impurtantas e detagls vegnan transferidas sin stgalim lescha. Uschia per exempel era las determinaziuns davart ils dretgs politics. La nova lescha davart quests dretgs politics è la segunda fatschenta ch'il suveran ha da decider.

  • vopna Cuira
    Legenda: Cuira RTR

    Cuira

    Il suveran da la chapitala grischuna ha da decider davart quatter fatschentas: En il center statt la lescha da polizia dal 2008 che duai vegnir schluccada tranter auter cun abolir il scumond da consumar alcohol sin terren public durant la notg. Plinavant vai per reducir la cumissiun da furmaziun da 9 sin 7 persunas, per dar giu en dretg da bajegiar terren per che la Scol'auta spezialisada dal Grischun (FHGR) po realisar ses nov center da scola e per adattar l'urden fundamental.

  • Vopna da Domat
    Legenda: Domat RTR

    Domat

    Ils da Domat elegian lur represchentantas e represchentants en il parlament communal. En tut 33 persunas candideschan per ils 15 sezs. A Domat è tradiziunalmain la PCD la ferma partida (6 sezs), suondà da la PS e la PPS (mintgamai 3 sezs), la PLD (2) ed in independent.

  • vopna Val Müstair
    Legenda: Val Müstair RTR

    Val Müstair

    En la suprastanza communala èn anc liber dus sezs. Ils 8 da november han quatter persunas survegnì vuschs - dentant betg cuntanschì la maioritad absoluta: Annelise Albertin-Burri, Gisella Beretta, Ivo Lamprecht e Roman Oswald. Gia elegids en suprastanza communala èn Rinaldo Lechthaler, Guido Mittner, Daniel Pitsch, Patrick Wegmann e sco presidenta Gabriella Binkert Becchetti.

  • vopna Tujetsch
    Legenda: Tujetsch RTR

    Tujetsch

    Votantas e votants da Tujetsch pon s'exprimer davart la dumonda: Cussegl da vischnanca ubain la radunanza communala? I sa tracta dentant mo dad ina votaziun consultativa, pia per sentir il puls da la populaziun per savair en tge direcziun reveder la constituziun communala. Dapi intgins onns sa fatschenta ina cumissiun cun questa revisiun e la finamira da simplifitgar las structuras politicas.

  • vopna Trun
    Legenda: Trun RTR

    Trun

    Il suveran da Trun ha d'eleger ils 15 commembers dal cussegl da vischnanca - pia dal parlament communal.

  • vopna Sumvitg
    Legenda: Sumvitg RTR

    Sumvitg

    Votantas e votants da Sumvitg han da cumplettar la suprastanza communala. Ignaz Deplazes ha demissiunà. Il mument n'èn anc nagins candidats enconuschent per remplazzar el en il gremi.

  • vopna Mustér
    Legenda: Mustér RTR

    Mustér

    Sur il vitg da Mustér duai dar ina nova via forestala da la Val Segnas fin la Val Son Placi. Suenter ch'il cussegl da vischnanca ha approvà il project che custa en total 3,9 milliuns francs, sto uss il suveran decider sch'el vul acceptar in meglier access al guaud da protecziun. L'entir project è planisà ils proxims 25 onns e custa en tut 23 milliuns francs.

  • vopna Scuol
    Legenda: Scuol RTR

    Scuol

    La vischnanca sto determinar il spazi da las auas (auals, flums e lais) sin l'entir territori communal sin fundament da la lescha federala davart la protecziun da las auas dal 2011. Quai cun la finamira da garantir las funcziuns natiralas, la protecziun cunter auas grondas ed il diever da l'aua. Cunquai che questa determinaziuns èn ina part da la planisaziun locala èsi da reveder quella.

  • vopna Glion
    Legenda: Glion RTR grafica

    Ilanz/Glion

    En la fracziun da Rueun vul ina scrinaria engrondir ses manaschi sper la via chantunala. Per pudair realisar il bajetg annex cun remisa, magasin e duas stanzas da deposit sto la zona da commerzi vegnir engrondida. Pertutgà da l'engrondiment da la zona è era terren agricul ch'è en posses da la vischnanca.

  • vopna Lumnezia
    Legenda: Lumnezia RTR

    Lumnezia

    La vischnanca Lumnezia sto adattar sia lescha communala perquai ch'il Cussegl grond ha approvà il favrer 2019 ina revisiun parziala da la lescha da taglia e da la lescha davart las taglias communalas e taglias da baselgia. En questas revisiuns vegnan unifitgadas las taglias sin ierta e donaziuns tranter chantun e vischnancas, vitiers mida il chantun da la taglia sin relasch sin la quota d'ierta. La regenza grischuna metta en vigur las revisiuns sin l'emprim da schaner 2021. Sin quest termin ston er vegnir adattada la basa legala communala.

  • vopna Claustra
    Legenda: Claustra RTR

    Claustra/Serneus

    En in segund scrutini ston vegnir elegids per il cussegl communal anc trais commembras u commembers per la perioda d'uffizi dal 2021 fin il 2024. Plinavant ha il suveran da decider davart il preventiv 2021 e da fixar il pe da taglia. Vitiers han votantas e votants anc da decider d'ina iniziativa communala davart in'inquisiziun administrativa. Ils iniziants vul tranter laschar sclerir sch'i vegn sa tegnì vid las cumpetenzas finanzialas tenor la constituziun, las indemnisaziuns als commembers da l'administraziun e las raschuns per la fluctuaziun da persunal en l'administraziun communala.

  • Vopna Vaz
    Legenda: Vaz RTR

    Vaz

    Il suveran da Vaz decida da reveder trais leschas. Uschia quella da la constituziun communala, là vai per augmentar il temp d'uffizi da las autoritads communalas sin quatter onns. Plinavant decidan votantas e votants davart la lescha da taglia sco er davart la lescha da firads publics. Affars duain pudair decider sez sch'els vulan avrir durant dis da paus sco Nadal. Ultra da quai vai anc per la vendita da l'anteriura chasa communala a Zorten, il cussegl communal vul vender quella per 250'000 francs ad ina firma che vul far laderor abitaziuns.

  • vopna da Favugn
    Legenda: Favugn RTR

    Favugn

    A Favugn han votantas e votants da decider davart ina revisiun parziala da la planisaziun locala nua ch'i va per determinar il spazi da las auas (auals, flums e lais) sin l'entir territori da la vischnanca. Vitiers ha Favugn era d'adattar sia lescha da taglia communala puncto taglias sin iertas e donaziuns a la lescha da taglia chantunala.

  • vopna da la vischnanca d'Arosa
    Legenda: Arosa RTR

    Arosa

    Il hotel Vetter (datiers da la staziun da viafier e da la staziun a val da las pendicularas Weisshorn) duai vegnir cumplettà cun in bajetg annex che pertutga il parcadi en il sid e duas parcellas cunfinantas. Per pudair realisar quest bajetg annex dovri ina midada en la lescha da bajegiar, ina midada dal plan da zonas, in plan general da furmaziun ed ina runcada da 259 meters quadrat.

  • vopna Grono
    Legenda: Grono RTR

    Grono

    14 persunas candideschan per ils 15 sezs dal cussegl communal per la perioda d'uffizi 2021 - 2024. Vitiers decida il suveran davart in credit da 1,55 milliuns francs per il mantegnair e per segirar il flum Calancasca e davart il mandat da prestaziun a la Regiun Moesa per administrar il register funsil dal circul.

  • vopna Roveredo
    Legenda: Roveredo RTR

    Roveredo

    A Roveredo sto la populaziun decider davart in credit da 155'000 francs per il mandat da prestaziun a la Regiun Moesa per administrar il register funsil dal circul.

Dossier online rtr.ch/votaziuns

Dossier online rtr.ch/votaziuns

Sin in clic tut las fatschentas federalas e communalas.

RTR votaziuns 2020

Artitgels legids il pli savens

Scrollar a sanestra Scrollar a dretga