Ils 14 da zercladur 2026 elegia il Grischun puspè ina nova regenza. La partida dal Center ha annunzià lur emprims candidats. Marcus Caduff e Carmelia Maissen candideschan per ina terza, respectivamain per ina segunda perioda d'uffizi. Cunquai che Jon Domenic Parolini ha la fin dal 2026 cuntanschì la limita dal temp d'uffizi da 12 onns, sto el bandunar ses post. La partida ha uss annunzià da vulair defender quest sez. Cun tgi ch'els van en cursa è dentant anc avert.
Sco la partida scriva en sia communicaziun duain las partidas regiunalas e cirquitalas preschentar in nov candidat u ina nova candidata – quai fin mez october. La radunanza da nominaziun ha lieu la fin da quest onn.
Las elecziuns han lieu ils 14 da zercladur 2026. Sper ina nova regenza, vegnan er elegids las deputadas ed ils deputads dal Cussegl grond.
Sper la partida dal Center ha era gia la Partida socialdemocratica annunzià da vulair ir en cursa cun il cusseglier guvernativ vertent Peter Peyer. Sche ina segunda candidata u in segund candidat vegn en dumonda era la partida anc vi d'examinar.
Plinavant ha la Partida verd-liberala grischuna nominà Nora Saratz Cazin uffizialmain sco candidata per la regenza grischuna. Ella candidescha per l'emprim sez da la Partida verd-liberala en la regenza grischuna. L'ultima giada aveva la partida preschentà ina candidatura il 2014. Da lez temp aveva Jürg Kappeler candidà, n'è dentant betg vegnì elegì.