Dapi bunamain in onn na pon chors betg pli far provas e concerts. Il chantar en cumpagnia è numnadamain vegnì scumandà il mars passà. La dirigenta dal district Engiadina, Bregaglia, Puschlav e Val Müstair, Ladina Simonelli, fa gronds quitads, co ch’i va vinavant cun intgins chors.
La fin per in u l’auter chor
Il fatg che intgins chors stettian gia sin chommas falombras – er causa ch’igl han difficultads da chattar novs commembers – pudess la situaziun actuala esser il stumpel ch’in u l’auter chor en il district mora.
Pli lung ch’il scumond da chantar cuntinuescha – e pli grond è il privel ch’intgins chors moran.
Finamira a lunga vista
Il pli impurtant en la situaziun actuala è tenor Ladina Simonelli, da tuttina betg perder il contact, sche necessari er sur telefon – e d’avair ina finamira a lunga vista. Per ils chors da las valladas dal Sid è quai segir la festa da chant districtuala en Val Müstair, ch'è vegnida spustada da quest onn sin l’onn 2023.
