Pliras pendicularas sursilvanas hajan inoltrà la dumonda per indemnisaziun da lavur curta. Simplamain perquai che las cundiziuns da naiv hajan chaschunà che betg tut las pendicularas han pudì esser en funcziun.
Quai ha era chaschunà che betg tut las ustarias en ils territoris da skis eran accessiblas. Tenor Gian Reto Caduff, il manader da l'Uffizi per industria, mastergn e lavur dal chantun Grischun hajan els survegnì sis annunzias. Da quai sajan tschintg or da la gastronomia ed ina pendiculara.
Sumegliantas situaziuns haja gia dà l'onn 2015/16 ed il december 2022 fin il mars 2023. Tranter ils sis manaschis da la branscha turistica grischuna ch'han tschentà la dumonda al chantun Grischun per indemnisaziun da lavur curta sa chattan era las pendicularas da Mustér.
Or da l'archiv:
Las pendicularas da Mustér pateschan sco la pli gronda part da las pendicularas sursilvanas da la mancanza actuala da naiv. Tranter ils 20 da december 2025 ed ils 20 da schaner 2026 hajan ins nudà in minus da la svieuta d'in milliun francs cumpareglià cun la medema perioda da la stagiun 2024/25.
Access a la lavur curta han manaschis turistics che pateschan da mancanza da naiv e che nodan ina digren da la svieuta da 75% cumpareglià cun la media da tschintg onns cuntanschida durant il medem spazi da temp. Vegnan las dumondas per lavur curta concedidas, vegnan las interpresas indemnisadas cun 80% da las uras da lavur mancantas. Quai tenor las infurmaziuns accessiblas via la pagina da l'Uffizi chantunal per industria, mastergn e lavur. Mustér n'ha dentant betg survegnì il sustegn da l'uffizi.
Fin ils 5 da favrer han las pendicularas temp per inoltrar la dumonda. Tenor Stefan Arnold, il mainafatschenta da las pendicularas Mustér, na dettian els betg si. Els emprovian vinavant e speran sin indemnisaziuns da l'uffizi.
Sper il territori da skis da Mustér han er auters da cumbatter cun pauca naiv. La grafica mussa che intgins territoris en Surselva sco er en il Grischun Central han avert be la mesadad ubain pli pauc che la mesadad dals kilometers pista.
Situaziun en hotels meglra
Tenor Ernst Wyrsch, il president da hotelleriesuisse Grischun, saja la situaziun da tals hotels en Grischun dentant in zic autra.
La mancanza da naiv fa actualmain pli e pli quitads a nus, ma tut en tut essan nus fitg cuntents cun la situaziun sco quai ch'ella è.
I dettia trais tips d'osps, declera Ernst Wyrsch – quels che dormian en ils hotels, mo na van betg cun skis, da quels che han planisà dad ir cun skis e fan ussa simplamain insatge auter sco per exempel ir a spass, e lura datti anc quels giasts ch'annulleschan las vacanzas d'hotel, sch'i ha memia pauca naiv. «Quests giasts fan quitads a nus», di il president da hotelleriesuisse Grischun.
Tuttina spetgia el in grond dumber d'osps e bunas cifras durant las vacanzas da sport, che cumenzan ils 20 da favrer en il Grischun.