Il december da l’onn passà è il palancà da la chasa Carigiet crudà a terra da la naiv pesanta. Per fortuna n’hai betg dà donns pli gronds, ma la finamira ed il giavisch da la populaziun da Trun d’allontanar quest palancà è ì en vigur. Ils ultims mais è vegnì realisà in tetg plat sin il bajetg ed il palancà è svanì. Er è la fatschada da la chasa vegnida renovada uschia ch’ella sa preschenta uss en in nov vestgì senza la cuvrida da gip. Tuts sajan stads surstads co che la chasa vesa uss ora «ed ella sa preschenta propi bain», di la commembra da la suprastanza da l’uniun Trun Cultura, Erica Cavegn-Pfister. Uss è la finamira da realisar la stad ina stgala en il bajetg per pudair far accessibel il tetg. Ils ulteriurs pass per quest onn èn da far la planisaziun per las stanzas en l’intern e da guardar sch'i fiss pussaivel da realisar in tetg da spitg sin quest bajetg, di Erica Cavegn. Ma tut dependa da las finanzas, uschia èsi impurtant da far il pass tenor la chomma e da laschar temp per vegnir ensemen cun la finala tranter 5 e 6 milliuns francs.
Il 2030 è ina finamira
Ils ultims onns hajan ins adina gì speranza che tut giaja svelt, ma la realitad haja franà las aspectativas da l’uniun, di Erica Cavegn. Realistic saja da far ina planisaziun rullanta che tegn lura er, e quai saja prudent e realistic. Uschia na vulan els propi betg dir in termin da finiziun, ma realistic saja per exempel il 2030, di Erica Cavegn sin la dumonda da fixar in termin. Ella craja dentant en quest project e perquai vegnia ella er a s’engaschar vinavant, di la dunna ch’abitescha a Schlans e fa er part da la suprastanza communala.
Lunga odissea
La chasa Carigiet a Trun sin plazza Cadruvi è la chasa paterna dals dus artists da renum Alois e Zarli Carigiet. Ella è brischada giu il 2019 quasi dal tuttafatg. Silsuenter ha ella fatg tras ina odissea. Uschia n’èsi betg stà cler co ch'ins po liberar quella chasa dal ruin. La gronda part era suenter quel brischament decadent e betg pli pussaivel da reconstruir. Perquai è la chasa stada ditg ina ruina senza tetg e la plievgia e la naiv han donnegià vinavant ils mirs e l’entira structura dal bajetg. Lura ha l’uniun Trun Cultura pudì cumprar il bajetg e realisar in tetg provisoric da puntanadas ch’ha protegì la ruina d’ulteriura plievgia e naiv. Dasperas èn surtut las finanzas stadas il grond crap da stgarpitsch da realisar la visiun d’ina chasa d’art e sentupada per amaturs d’art, surtut da l’art da Alois Carigiet. Quella finamira è anc adina la visiun finala da l’uniun per quest bajetg.
