«Cun maletgs regulars d'autos ch’èn venals da garaschas gudogn jau mes paun dal mintga di», di il giuven da Glion. Ses num s’accorda cun las iconas da la branscha: Maserati, Bugatti, Ferrari. Dario Fontana preschenta autos sperts ed exclusivs, cun motors da 600 PS e dapli.
«Igl n'è betg mo mia professiun, mobein mia passiun», conceda l’um da 25 onns, ch’è creschì si a Glion. El ha pudì realisar ses siemi da buob. Ils davos onns ha el lavurà sco schurnalist per la revista «Auto-Illustrierte» e sco fotograf ed organisatur tar l’interpresa «Autowelt Schweiz». El el ì cun autos sperts e custaivels, sia lavur èsi stà, tranter auter, da testar McLarens, Porsches, Lamborghinis ed auters.
Presentar dignamein els
Il schaner da quest onn ha Dario Fontana prendì sez las hottas enta maun, dapi lura è el fotograf d’autos independent. Savens saja el da viadi, en lieus nua ch’i ha autos sperts e prestigius. El sez posseda dus plitost convenziunals, in simpel Toyota, ed in Alfa Romeo. «Lez è in oldtimer da l'onn 1986», agiunta l’amatur. El n'haja atgnamein nagin auto preferì, lascha dentant valair: «Il cor di Ferrari, il chau Porsche». La branscha d’autos exclusivs saja ses mund. El haja in veritabel mistregn da siemi, manegia Dario Fontana. Ins senta ses entusiassem. Ed ins pudessia cumparagliar quel cun in chatschadur grischun che raquinta da sias aventuras.
Dacurt è il giuven interprendider stà a Glion, nua ch'il redactur da la FMR è s’inscuntrà cun el. Dario Fontana para d’esser in modest e senza «cresta ad aut». Ni cravatta, ni vestgadira da marca tradeschan ch’el è ina persuna tschertgada en la branscha. El presenta dignamain – sco ch'i tutga – autos luxerius e sportivs. Ses sujets ston esser exclusivs, ed els n'èn betg quels d’in e scadin. Sumegliant sco in agent che venda ina villa suenter l’autra, u in aucziunari ch'offerescha preciusadads sco diamants u antiquitads.
«Ins sto esser mega-discret»
Ses clients èn garaschas cun marcas da luxus, ma era chasas d’aucziun e collecziunaders privats. Dus onns ha Dario Fontana lavurà a Gstaad per B.I. Collection, ina da las grondas interpresas svizras che marcadeschan cun tals vehichels. En grondas hallas sutterranas climatisadas, tut discretamein, seigien els pilpli parcai, tradescha el, leu spetgien scazis dalla via sco Bentley, Mercedes-Benz, Aston Martin, Ferrari ed auters. «Bia glieud investescha la facultad en autos, aschia sco ei dat glieud che rimna uras da Rolex ni maletgs d’Albert Anker», cumpareglia Dario Fontana.
«Jau sun extremamain engraziaivel ch’jau astg lavurar en quella branscha», sincerescha el ed agiunta in factur essenzial da quella: «Ins sto esser mega-discret». L'um ch'ha fatg in emprendissadi da mediamaticher è s’avanzà spert sco schurnalist d’autos. «Gia da buob avev’jau quella passiun per furmas, tuning e tempo», raquinta el. Da pitschen ensi hajan ils autos da sport, lur design, l’estetica e la forza dals motors fascinà el.
Cun il Mercedes McLaren
Davent da sia basa a Turitg è Dario Fontana oz savens là nua ch’ils clients cloman el. Quai po esser Monaco, Genevra, Londra, Basilea – u sco dacurt sin il pass dal Bernina. Là ha in garaschist da la Turgovia vulì preschentar in da ses scazis. El ha engaschà il giuven independent per in «fotoshooting», in'inscenaziun fotografica cun l'auto amez la cuntrada muntagnarda e stradun alpin.
Tar la qualitad d’in fotograf d’autos tutgi vitiers d’esser creativ e visual, ma era communicativ. La lavur è essenziala per commercialisar ils vehichels. Sin il Bernina ha Dario Fontana gì d’inscenar differents bolids per in’occurrenza dal fatg, il Bernina GT. Da la Turgovia è el charrà sur ils pass cun in Mercedes McLaren. Il di avant è el sa fermà a Glion tar ses geniturs. L’auto custaivel ha el parcà avant la garascha dal bab. En quai plaz è per ordinari l’auto pitschen dal bab parcà. Sch’el haja mai gì interess da surpigliar il manaschi da famiglia, è ina dumonda giustifitgada. «Na, jau n'hai betg l’inschign dal mistargner ch’i dovra, uschia è quei mai stà in tema», rispunda el.
Per l'adrenalin sin pistas da cursa
Uschia saja era daventà sia professiun da, per exempel, preschentar Maybachs e Bentleys – autos cun valitas da 250’000 fin dapli ch'ina milliun francs. Tranter auter lavura Dario Fontana per la chasa d’aucziun internaziunala Sotheby. «Far praula cun mia passiun n'è mai stà mia finamira», punctuescha il fotograf da Glion.
Far praula cun mia passiun n'è mai stà mia finamira.
Bugatti e Lamborghini tutgan tar ses mintgadi, el sa mova en la branscha dals amaturs d’autos sperts. Ins po s’imaginar che la limita da spertadad dad 80 sin las vias principalas svizras pudessan franar l’entusiassem per la forza da tals autos. «Gie, quai constat naturilmain. Per l'adrenalin hai jau dentant circa 10 dis ad onn la pussaivladad d'ir sin las pistas da cursa ch’i dat en l’Europa, per exempel Hockenheim, Nürnbergring, Monza u Dijon», di el.
Ir sin via cun in vehichel exclusiv para pulit riscant, pertge gia in pitschen sgriffel po custar immens bler. «La confidanza ch’jau survegn da mes clients cun surdar l’auto è mega-gronda», conferma Dario Fontana. Co el sincerescha, ha el anc mai gì in incap. Circa 37’000 followers suondan dal reminent las paginas da web dal fotograf d’autos da Glion ch'inscenescha ils autos da cult.