Il museum da Toyotas a Vuorz datti dapi sis onns. Il spezialist da reclama, Peppe Conrad, lavura a Laax e viva a Domat ed ha inizià il museum ensemen cun intgins amis. Durant ina guida en il museum raquinta el che ses geniturs avevian contacts cun la famiglia da Luzi Janki barmier che lavurava en la centrala electrica da Vuorz, e che abitavia dasperas cun sia famiglia. «Cura che nus avain tschertgà in lieu per exponer ils Toyotas, è la centrala da Vuorz vegnida endament a mai ed jau hai contactà la Repower SA sco possessura da la centrala», di Peppe Conrad.
«Nus avain pudì cumprar l’immobiglia ed adattar ella per noss scopo.» Ils davos sis onns ha la gestiun dal museum «STM Classics GmbH» augmentà cuntinuadamain la purschida d’autos construids suenter la Segunda Guerra mundiala en il Giapun. «Sper ils pressapauc 90 Toyotas che nus preschentain, organisain nus era differents events.»
Autos da persunas da sport e da lavur
Tut ils vehichels exponids a Vuorz èn donaziuns ad emprest. L’entira collecziun d’autos è represchentada en il museum. Dad autos pitschens culants, autos da sport, da famiglias, da luxus enfin a vehichels campesters, bus da campar e prototips rars. Il pli vegl auto datescha dal 1958, il pli nov da l'onn 2020.
Il schef dal museum, Peppe Conrad, explitgescha mintga model cun l'onn da construcziun ed il numer da seria. El declera las raschuns ch’ins ha construì ils differents models da Toyota, e pertge che la roda da manar è tar in exemplar da la vart dretga e tar in auter da la vart sanestra. E sa chapescha che Conrad è era documentà enfin il pli davos detagl cun l’istorgia tecnica da mintga Toyota. In exemplar che fa parada a Vuorz è ina limusina da luxus naira che vegn producida mo per l’elita dal Giapun. Igl è in auto che cuntegna perfin sezs da massascha sin ils plazs davostiers.
Dapli che guardar autos
Ils davos onns hajan el e ses partenaris dal Swiss Toyota Museum ponderà, co augmentar la purschida dal museum. «Actualmain essan nus vi da construir ina lounge sur la halla d’exposiziun. Quella po vegnir duvrada per arranschaments sco sesidas, radunanzas e festas.»
Nus avain per exempel ina sentupada regulara d’in club che vegn per baiver in aperitiv u era per tschanar inqual giada ensemen.
Davos la halla d’exposiziun – avant ch’ins va da la stgala radunda siadora en la segunda halla d’exposiziun – sa chatta ina bar e sper quella ina maisa da mangiar. Tenor il manader dal museum vegn quest local duvrà per inscunters societars. «Nus avain per exempel ina scuntrada regulara d’in club che vegn per baiver in aperitiv u era per tschanar inqual giada ensemen. Tschainas simplas sco grilladas faschain nus sezs, e pasts pli gronds organisain nus via catering.»
Biblioteca e tocca da reserva
Il Swiss Toyota Museum a Vuorz ha er ina biblioteca, sa chapescha ina biblioteca cun litteratura da Toyotas. Sco quai che Peppe Conrad di, vul il museum dentant era porscher tocca da reserva per Toyotas sco quels che sajan exponids. «Nus restaurain era Toyotas. Quai faschain nus ensemen cun garaschas che nus enconuschain.»
Pertutgant ils pretschs dals autos exponids en la veglia centrala electrica a Vuorz di il manader da l’exposiziun che quai saja fitg different. «Qua discurr’ins dad autos museals ch’ins paja enfin 20'000 francs. I dat dentant era tals ch’èn pli favuraivels.» Quai dependia era, quants exemplars ch’i dettia anc sin il martgà. Il pli stedi vegnian ils models dal Toyota Celica e dals models da Corola cumprads e vendids, di Peppe Conrad.
«Jau vuless far dapli»
«Entaifer ils proxims dus onns vom jau en pensiun», declera l'amatur d’autos vegls. «Jau vuless far dapli per noss museum. Ma il mument ma manca il temp.» El haja intginas ideas e quellas emprovia el da realisar ils proxims onns.