Il proxim grond pass d’avertura è ils 8 da zercladur. Quai aveva il Cussegl federal annunzià, cura che quel ha preschentà il plan d’avertura suenter che la vita publica en Svizra è vegnida englatschada pervi dal coronavirus.
Annunzià aveva il Cussegl federal, d'avrir ils 8 da zercladur pendicularas, bogns, bogns averts, kinos, teaters, zoos, plazzas da campadi ed era scolas medias, da mastergn e scolas autas. Quai sut la premissa che las cifras da persunas infectadas restia bassa e na s’augmentia betg.
La probabilitad è gronda che la regenza conferma quai oz, causa ch'il dumber da novas infecziuns è restà bass era suenter las emprimas duas etappas d’avertura.
Inscunters cun dapli che 5 persunas
Tenor decleraziuns dad experts dals ultims dis, pon ins supponer ch'il terz pass d’avertura vegn pli grond che quai ch'il Cussegl federal aveva oriundamain gì l'intenziun. Igl è per exempel vegnì enconuschent ch'il Cussegl federal vegn probablamain ad abolir il scumond dad inscunters cun dapli che 5 persunas. Co che quel scumond duai vegnir schlucca n'è anc betg cler. Tenor rapports e speculaziuns en gasettas propona il minister da l’intern Alain Berset da lubir inscunters e demonstraziuns cun fin a 30 persunas.
Plinavant vul el era lubir eveniments sco nozzas cun fin a 300 persunas, sche ils giasts vegnan registrads. Era lubids duain vegnir gieus da ballape e concerts. Sche las persunas stattan en pe duai quai esser pussaivel cun enfin 300 persunas, sch'i sesan lura cun enfin 1000 persunas. Premissa duai era qua esser la regla da dus meters distanza.
Era vegn debattà en la regenza davart la limita da quatter persunas per maisa en ils restaurants. Tut tenor pudess quella vegnir abolida.
Cunfins cun l’Italia
Surprendentamain aveva l’Italia annunzià dad avrir ils cunfins ils 3 da zercladur. La probabilitad che la Svizra avra era sin quel termin ils cunfins cun l’Italia è dentant pitschna. La raschun è, ch'ils cunfins cun l’Austria, la Germania e la Frantscha vegnan averts pir ils 15 da zercladur.