La mancanza d'abitaziuns è in problem che fatschenta. Per exempel vegnan gist trais iniziativas en votaziun en il chantun da Turitg questa fin d'emna, nua ch'i va per ils custs d'abitar. Bleras ideas – e tuttina n'èn schliaziuns strusch en vista.
En la debatta politica insistan las partidas sanestras che l'abitar na dastgia betg vegnir surlaschà sulettamain al martgà, mabain saja er ina incumbensa sociala. En spezial pretendan ellas ch' i vegnia construì pli intensivamain abitaziuns d'utilitad publica. Partidas burgaisas averteschan qua però da sfalsificaziuns dal martgà. Ellas mettan l'accent sin la promoziun da la proprietad d'abitar e sin main intervenziuns dal stadi.
La stgarsezza d'abitaziuns n'è daditg betg pli mo in fenomen dals centers d'aglomeraziun. En l'entir pajais èsi da tschentar la dumonda: Co po l'abitar restar pajabel?