Siglir tar il cuntegn

Header

audio
In sguard enavos sin la sessiun ch'è ida a fin
Or da Actualitad dals 18.03.2022.
laschar ir. Durada: 4 minutas 13 Secundas.
cuntegn

Sessiun da primavaira La guerra en l'Ucraina ha dominà la sessiun

Suenter ch'il coronavirus ha dominà per dus onns las sessiuns dal parlament è questa giada stada la guerra en l’Ucraina en il center.

Focus Ucraina

La sessiun da primavaira ha cumenzà cun ina minuta da silenzi per l'Ucraina. Era preschent era l'ambassadur ucranais en Svizra. Il Cussegl naziunal ha suenter acceptà cun gronda maioritad ina decleraziun da sustegn per l'Ucraina e cunter l'agressiun russa. En il Parlament federal sa mussan era las bleras politicras ed ils blers politichers cuntents ch’il Cussegl federal ha decidì da suandar las sancziuns da l’UE.

La Russia ha mess la Svizra sin ina glista cun num «stadis nunamicabels». La gronda part da las parlamentarias ed ils parlamentaris grischuns na vesan tuttina betg in problem per la Svizra d’esser neutrala e pudair intermediar tranter l’Ucraina e la Russia.

Rinforzar l'armada Svizra

La guerra en l'Ucraina ha procurà per in rearmament tar divers stadis da l'Uniun Europeica. Era en il parlament è vegnì discutà davart l'armada e la segirezza da la Svizra.

Il tenor en il Cussegl dals chantuns è cler: l'armada duai augmentar ses budget, la cumpra dals jets da cumbat duai ir pli svelt e l'abilitad da la Svizra da sa defender duai vegnir augmentada. Durant duas uras ha Il Cussegl dals chantuns discutà davart las consequenzas da la guerra per l'armada svizra. Decisiuns n'hai betg dà, dentant mussa la discussiun en tge direcziun ch'i pudess ir ils proxims mais. Tenor la Chombra pitschna ch'è dominada da las partidas burgaisas, sto l'armada vegnir pli ferma. Per la sanestra èsi dentant cler, ch'ins na cuntanschia pasch betg cun dapli armas. In'interpellaziun vuleva savair dal Cussegl federal co ch'el valitescha la situaziun.

Candidatura confermada

Il Cussegl naziunal è vinavant cleramain per ina candidatura da la Svizra per il Cussegl da segirezza da l'ONU.

Tenor il president da la Confederaziun Ignazio Cassis, saja uss anc pli impurtant da far part dal cussegl da segirezza che pli baud. La Svizra saja la vusch da las minoritads e da cumpromiss. E la Svizra possia metter a disposiziun bleras cumpetenzas al cussegl da segirezza.

Iniziativa per ils glatschers

Netto nulla fin il 2050. Quai vul l’iniziativa per ils glatschers. Davent dal 2050 na duai la Svizra betg pli producir dapli CO₂ che quai che la natira po absorbar cun u senza agid tecnic. Era duain betg pli vegnir duvrads carburants sco ieli, benzin, gas u diesel. Per il Cussegl naziunal va quella dentant memia enavant. Perquai ha la Chombra gronda refusà l'iniziativa, dentant approvà la cuntraproposta. Era quella ha la finamira da netto nulla fin il 2050. Ella na vul dentant betg scumandar ils carburants dal tuttafatg. La cuntraproposta cuntegna era excepziuns per las regiuns da muntogna.

Sustegn per pauras e paurs cunter ils lufs

Il parlament federal ha en la sessiun da primavaira approvà 5,7 milliuns francs dapli per proteger ils animals dal luf. Quels raps duain star a disposiziun a puras e purs per las mesiras da protecziun cunter il luf. Anc da sclerir è la basa legala per ils 5,7 milliuns.

Dapli davart la politica federala pudais vus tadlar en il podcast Café federal

RTR actualitad 12:00

Artitgels legids il pli savens

Scrollar a sanestra Scrollar a dretga