Ils parlamentaris e las parlamentarias han tranter auter da discutar durant en la sessiun davart differentas iniziativas.
Finanziaziun da la 13avla renta d’AVS
Ina da las iniziativas è quella per ina 13avla renta d’AVS. Quella ha il suveran svizzer acceptà il mars 2024 a l’urna. Uss sto il parlament decider co exact realisar quella. Oravant tut vai per la dumonda da la finanziaziun. Qua datti dus models: Il Cussegl naziunal vul finanziar quella unicamain sur la taglia sin la plivalur entant ch'il Cussegl dals chantuns vul finanziar la 13avla renta tant sur la taglia sin la plivalur ma er cun auzar l'import che vegn tratg giu da las pajas.
Reveder scumond per novas ovras atomaras
Discussiuns chaschuna era l’iniziativa cun il num «evitar in blackout». Quella vul tranter auter reveder il scumond da construir novas ovras atomaras. Plinavant pretenda quella ch'il provediment d'electricitad vegnia adina garantì e che la Confederaziun è en l'avegnir responsabla en chaussa. Tranter auter perquai che la Confederaziun stuess surpigliar questa responsabladad refusa il Cussegl federal l'iniziativa, propona dentant ina cuntraproposta che duai pussibilitar da construir novas ovras atomaras per garantir il provediment d'electricitad. Il Cussegl dals chantuns ha debattà en la sessiun passada ed ha acceptà la cuntraproposta. Uss è il Cussegl naziunal vidlonder.
Ed auter che tar l'iniziativa per ina 13avla renta na vai qua anc betg per elavurar ils detagls per realisar l’iniziativa, mabain per ina recumandaziun al suveran a l'urna.
Puspè adattar il sistem da taglia?
Interessanta vegn er la debatta da l'iniziativa dal Center davart il sistem da taglia. L’iniziativa «Gea a taglias federalas gistas er per ils pèrs maridads» metta il parlament en ina situaziun difficila. Il mars da quest onn ha il suveran decidì da midar il sistem da taglia cun introducir la taglia individuala che prevesa che mintgina e mintgin sto emplenir ora in’atgna decleraziun da taglia.
L’iniziativa dal Center vul en sasez puspè midar il sistem uschia che pèrs maridads ston puspè emplenir ora be ina decleraziun da taglia, quai che purtass in avantatg a pèrs maridads en congual cun persunas singulas. Sche questa iniziativa vegness er acceptada a l'urna, dessi in Gea a dus differents sistems e quai n'hai anc mai dà uschia: il parlament fiss lura dumandà da chattar ina via. Il Cussegl dals chantuns è vidlonder en questa sessiun da far ina recumandaziun per l'urna – il Cussegl naziunal ha gia decidì en l'ultima sessiun da recumandar in Na.
Differentas tractandas cun paisa
Sco il davos temp adina puspè, procura l'armada per lingias grassas. Il Cussegl dals chantuns tracta sco emprim cussegl la missiva da l'armada 2026. I va per in credit supplementar da 3,4 milliardas francs.
Er da discutar vegn a dar la revisiun da la lescha federala dal servetsch d'infurmaziun. Là vai tranter auter per la dumonda, sch'il servetsch secret duai survegnir pli savens la pussaivladad da tadlar giu telefonins – quai be ina da diversas cumpetenzas en pli ch’il servetsch secret duai survegnir.
Ed interessanta è er in'iniziativa che vegn dal chantun Turitg – quella vul pussibilitar al commerzi en detagl d'avrir las butias 12 dumengias ad onn.