En bun in mais votescha il pievel svizzer davart l’identitad electronica e davart la taxa sin immobiglias sin segundas abitaziuns. Nov è ch'il cedel grisch cun si las dumondas è era vegnì translatà per rumantsch. Quai è nov sin palc federal. Las missivas ed infurmaziuns èn gia dapi pli ditg era per rumantsch. Sin palc communal e chantunal èsi gia pli ditg uschia ch’il cedel da votaziun è scrit per rumantsch.
La societad retorumantscha haja deponì questa dumonda tar il chantun. La regenza grischuna ha fatg questa dumonda tar la Confederaziun, uschia declara quai la chanzlia chantunala. Uschia èsi vegnì tar quai che la Confederaziun ha translatà las dumondas sin ils cedels per rumantsch. En Grischun survegnan las persunas pia il cedel per tudestg, per talian ed era per rumantsch.
Cun vuschar sa mida nagut per las votantas e votants. Sco enfin qua pon ins scriver la resposta en questa lingua ch’ins vul – unica premissa è che la voluntad è clera. Quai po pia esser in gea, in ea, in schi, in ja, in si ed uschia vinavant. I sto betg esser per rumantsch grischun. Las vischnancas che quintan las vuschs decidan tge cedel ch’è valid e tgenin betg.
L'exempel da las proximas votaziuns
Per las proximas votaziuns dals 28 da settember èn enconuschentas las cifras totalas da las missivas che vegnan stampadas en pliras linguas e furnidas al Grischun (box).
- 130'000 en tudestg
- 14'000 en talian
- 13'500 en rumantsch
- 700 en franzos
Il dumber da las vischnancas che giavischan e furneschan a la populaziun la versiun rumantscha variescha, sco quai ch'ina retschertga da la FMR tar Mustér, Scuol e Surses mussan.
