Cuira
Ils custs per la colliaziun directa da Cuira a Brambrüesch cun ina pendiculara èn s'augmentads marcantamain ils davos set onns – il motiv saja surtut la chareschia. Pervia da quest augment da custs sto la populaziun da Cuira votar danovamain. Il 2019 aveva la populaziun approvà in credit da 24,4 milliuns francs. Uss dumonda la citad per in nov credit en l'autezza da 40,6 milliuns francs.
Plinavant sto il suveran da la chapitala decider sch'el vul auzar la contribuziun annuala per la biblioteca da la citad dad 1'089'000 francs sin 1'248'500. Pia 159'500 francs dapli per onn. Sco la citad scriva en il messadi vegnia la biblioteca nizzegiada da bleras persunas, na possia ord divers motivs dentant betg cuvrir ils custs. Oravant tut la chareschia haja auzà ils custs, p.ex. per servetschs dad IT. Ord quest motiv dai la contribuziun annuala da la citad vegnir auzada.
Mustér
Las pendicularas da Mustér vulan realisar in nov parc da gieus e moviment sin l'areal dal Center da Fontauna. Quel vegn a custar tranter 9 e 10 milliuns francs. La vischnanca duai sa participar als custs cun desister da la restituziun da debits dad 1,75 milliuns francs – dad in credit che la vischnanca aveva concedì a las pendicularas per realisar la pendiculara Sedrun-Cuolm da Vi.
Albula/Alvra
La vischnanca surlavura 11 onns suenter la fusiun la constituziun communala. Ina midada centrala è il termin d'elecziun per il presidi communal. Quel duai en il futur gia esser en l'emprim semester da l'onn. Quai dettia dapli temp per ina surdada ordinada. In'ulteriura novaziun impurtanta è l’introducziun d’in cussegl da scola cun tschintg commembers che vegn elegì a l’urna. Però datti er reglas pli cleras davart sesidas, proceduras da decisiun e cumpetenzas da las autoritads.
Brusio
En la Val Poschiavo datti ina elecziun substitutiva per il president communal, per la perioda d'uffizi dal 2024 enfin 2027. Il president actual, Pietro Della Cà ha gia il mars passà annunzia da sa retrair dal post sin il zercladur 2026, cura che ses mandat en il Cussegl grond va era a fin. Sco motiv ha el gì inditgà ch'el n'haja betg pli la forza per quest post pretensius. Per il post datti dus candidats:
- Davide Migliacci
- Giancarlo Plozza
San Murezzan
Sco davosa vischnanca da l'Engiadin'Ota sto San Murezzan decider davart la nova structura per il provediment da sanadad en la regiun. Per l'ina vegn votà davart la lescha per crear la «Sanadura» e per l'autra davart las trais novas cunvegnas da prestaziun en quest connex. Cunquai che las ulteriuras vischnancas han gia approvà la lescha, vai per San Murezzan mo per la dumonda sche la vischnanca duai esser part da la nova structura u betg.
Flem
La vischnanca da Flem dumonda in credit da 700'000 francs per revitalisar tschintg anteriurs foss da sauaziun. Quels sa chattan tant en l'ost sco en il vest da la vischnanca e duain cun la revitalisaziun puspè manar aua durant la stad. Il project è ina mesira substitutiva per cumpensar intervenziuns en spazis da viver sensibels.
Plinavant sto la populaziun da Flem decider davart la revisiun parziala da la planisaziun locala per la cuntrada da palì «Plaun Segnas Sut». Las vischnancas ston proteger las cuntradas da palì e cun la revisiun planisada vegnan las zonas da protecziun definidas ed ils cunfins da la cuntrada «Plaun Segnas Sut» fixads.
Sco terz project han ils da Flem da decider davart la revisiun parziala dal plan general d'avertura. Quel definescha nua che stabiliments da provediment e d'allontanament èn situads. Plinavant èn era parcadis, indrizs d'ennavar e sendas da viandar e trails da bike integrads en il plan general d'avertura. L'actual plan da Flem è da l'onn 2002 e n'è silsuenter mai vegnì surlavurà grond. Perquai na correspundia quel betg pli a la situaziun actuala.
Claustra
Las pendicularas da Tavau Claustra vulan remplazzar la pendiculara da Schifer sin il Weissfluhjoch. Cunquai che la nova pendiculara è sin quasi il medem traject na dovri nagina midada da la planisaziun locala – sulettamain il contract da servitut sto vegnir adattà. Il nov contract vala enfin ils 31 da matg 2086 e sto vegnir acceptà a l'urna.
Plinavant sto la populaziun da Claustra decider davart in credit da 4,6 milliuns francs per sanar las vias da guaud en il territori «Riss Monbiel». Las vias sajan radund 60 onns veglias e betg pli adattadas per ina cultivaziun moderna dal guaud. Il chantun vegn pli probabel a surpigliar 71% dals custs. Per la vischnanca restan alura anc custs dad 1,34 milliuns francs.
Vaz
Il Heidsee a Lai vegn nizzegià fermamain durant la stad, per far bogn e sa divertir. Tenor la vischnanca n'è l'infrastructura betg pli adattada per il dumber da giasts – perquai duai vegnir creà in nov «Lido». Per quest motiv dumonda la vischnanca in credit da 5,6 milliuns francs per demolir las veglias structuras e construir in nov areal da recreaziun. Las lavurs da construcziun duain cumenzar parallel cun la reconstrucziun dal mir da fermada dal lai, pia la stad 2027.
Arosa
Ad Arosa vegn la planisaziun locala revedida parzialmain per il «Masterplan Bike». La revisiun è necessaria per pudair construir divers trails da velo e per separar sendas da viandar dals trails da bike.
Malans
In bajetg che tutga a la vischnanca duai vegnir sanà e nizzegià da nov sco canorta d'uffants. Per pudair far quai sto la populaziun approvar in credit da 2,45 milliuns francs.