La radunanza da la Lia Rumantscha na vul en l'avegnir nagin copresidi. Elegì è vegnì l'anteriur ambassadur e vicedirectur e schef dal persunal dal Departament federal d'affars exteriurs Chasper Sarott cun 47 vuschs (maioritad absoluta da 25).
- Chasper Sarott ha survegnì 47 vuschs,
- il copresidi dad Urezza Famos e Bernard Maissen duas vuschs,
- ina vusch è stada nunvalaivla.
Cunquai ch'i sa tracta d'ina elecziun substitutiva – suenter che Gianna Luzio ha demissiunà avant in onn – è Sarott elegì per in onn. L'onn proxim succeda l'elecziun ordinaria per la perioda d'uffizi da trais onns.
Presidentas e presidents da la Lia Rumantscha
-
Bild 1 von 10. Chasper Sarott . president novelegì da la Lia Rumantscha. Bildquelle: FMR.
-
Bild 2 von 10. Gianna Luzio ed Urezza Famos . Copresidenza 2022-2025. Bildquelle: RTR.
-
Bild 3 von 10. Johannes Flury . 2016-2021. Bildquelle: RTR.
-
Bild 4 von 10. Duri Bezzola. 2013-2015. Bildquelle: RTR.
-
Bild 5 von 10. Vincent Augustin . 2004-2012. Bildquelle: RTR.
-
Bild 6 von 10. Jost Falett . 1997-2003. Bildquelle: RTR.
-
Bild 7 von 10. Chasper Pult . 1992-1996. Bildquelle: RTR.
-
Bild 8 von 10. Toni Cantieni . 1984-1991. Bildquelle: RTR.
-
Bild 9 von 10. Romedi Arquint . 1977-1984. Bildquelle: RTR.
-
Bild 10 von 10. Pierin Ratti 1964-1977, Andrea Bezzola 1963-1964, Steafan Loringett 1946-1963, Giachen Conrad 1919-1945. Bildquelle: Keystone.
Urezza Famos ch'era vegnida elegida il 2021 sco copresidenta ensemen cun Gianna Luzio aveva previs da cuntinuar er en avegnir cun il model d'in copresidi ensemen cun Bernard Maissen. La radunanza da la Lia Rumantscha ha dentant decis per Chasper Sarott, oriund da Sent.
Critica envers agir areguard la demissiun dal secretari
Ils scumbigls enturn la demissiun dal secretari èn stads en il center da las discussiuns intensivas. Diversas delegadas e delegads han prendì pled e n’èn betg d'accord cun la relaschada dal secretari Markus Solinger. Divers delegads èn da l'avis ch'ils statuts prescrivian cleramain quest post.
Midadas procuran per malsegirtad, quai è chapibel.
Ina gronda lavur è vegnida communitgada falladamain
Da princip èn divers da l'avis che la strategia preschentada saja segir impurtanta, ma ins avess spetgà dapli collavuraziun tranter las delegadas ed ils delegads e la suprastanza da la Lia Rumantscha. La Lia Rumantscha sa defenda da questa tenuta, tenor ella era la participaziun da vart da las instituziuns manglusa.
Il rendaquint 2025 n'è betg vegni acceptà da tut las instituziuns
L’Uniun dals Grischs pretenda dapli transparenza puncto las finanzas. La suprastanza da l’Uniun dals Grischs ha perquai proponì da betg acceptar il rendaquint 2025. Er la Surselva Romontscha ha gì dumondas davart expensas betg documentadas en detagl.
Il puls po esser aut – ma jau appellesch da focusar sin il futur per garantir in bun prosperar.
La copresidenta Urezza Famos refusa il pled «transparenza», tenor ella saja la Lia Rumantscha adina stada transparenta ed haja mussà nua ch'ils daners flueschan. Tuttina ha la radunanza finalmain acceptà il quint 2025 cun 25 vuschs Gea, 19 Na e singulas abstenziuns.
Elecziun suprastanza da la Lia Rumantscha
Da nov fa Leo Thomann part da la suprastanza da la Lia Rumantscha. El remplazza Patric Vincenz. Thomann è selvicultur pensiunà ed anteriur president da la vischnanca da Surses. En la suprastanza da la Lia Rumantscha represchenta Leo Thomann l’Uniun Rumantscha Grischun Central.
La Lia Rumantscha è vegnida fundada l'onn 1919 a Cuira, sco organisaziun da tetg da tut las differentas organisaziuns rumantschas da lezs temps. Ella ha sia sedia principala a Cuira en la Chasa Rumantscha. Ultra da quai ha la Lia Rumantscha biros regiunals a Glion, Savognin e Scuol.
La Lia sa definescha sco instituziun d'util public ch'è politicamain e confessiunalmain independenta. La finamira da la Lia Rumantscha è da sustegnair, promover e coordinar ils projects da las organisaziuns regiunalas e surregiunalas a favur da la lingua e cultura rumantscha. Ella s’engascha per la promoziun ed il mantegniment dal rumantsch e represchenta la Rumantschia en ils differents champs da la vita sociala e statala entaifer ed ordaifer il territori rumantsch tradiziunal.
En ils onns 1919 fin 1980 ha la Lia Rumantscha surtut procurà per ovras da basa sco vocabularis e grammaticas. A partir dal 1982 ha ella lavurà fermamain al svilup e l'introducziun dal rumantsch grischun.
La Lia etablescha servetschs specifics sco translaziuns, lectorats, sustegn linguistic, curs e la vendita da cudeschs e portatuns, edescha medias per uffants e giuvenils e redigia vocabularis electronics.