Siglir tar il cuntegn

Header

audio
Tes vitg – tia istorgia: Il facit tar la visita a Ziràn-Reschen
Or da Actualitad dals 31.07.2020.
laschar ir. Durada: 03:51 minutas.
cuntegn

«Tes vitg – tia istorgia» Quai èsi stà da Ziràn-Reschen

RTR ha quest'emna fatg visita a Ziràn-Reschen e chattà massa interessantas istorgias, persunas e fatgs.

Ils emprims dus dis hai gì num sa preparar, sa fatschentar cun la pitschna vischnanca en Val Schons e chattar or in u l'auter contact interessant. Agid avain nus tranter auter survegnì d'audituras via messadi e telefon. Ed er l'anteriur collavuratur da RTR Christian Joos. El enconuscha la Val Schons quasi sco ses agen satg da chautscha.

Il mardi avain dà in sguard en l'archiv da RTR. Tranter auter sin la renumada baselgia da S. Martin cun ses 153 dissegns vi dal palantschieu sura. Er la tauna da cult che vegniva duvrada da pajauns gist damanaivel da la baselgia n'ha betg mancà. Ed il nov «chastellan» dal chastè Haselstein sur Reschen avain er gia udì in'emprima giada.

Las istorgias da Ziràn

Gia mardi saira curt suenter che nus eran arrivads, avain gia pudì visitar Felix Nöthiger sin il chastè Haselstein. El ha restaurà e reconstruì dal tuttafatg la ruina. E quai entaifer 50 onns.

Mesemna ha l'anteriur postenent da Ziràn, Jakob Clopath, raquintà or da 45 onns en servetsch tar La Posta. E gia da ses temp n'era la relaziun tranter pot e chaun betg adina la meglra. Ma tadlai e guardai sez.

Plinavant avain nus er visità l'anteriura ustiera da l'Ustria Pro l'ava. Per Elsbeth Iseppi-Cantieni è in siemi ì en vigur l'onn 1981 cun l'atgna ustaria. Las festas ed ils bels inscunters cun turists e cunzunt cun ils indigents mancan anc adina ad ella. Er sch'ella è gia plirs onns pensiunada e l'ustaria serrada.

E lura avain anc gi in inscunter tut spezial. Patrick Müller, 33 onns ed oriund da Susch, ha visità nus en la rulotta. E raquintà daco ch'in giuven Engiadinais chatta adina puspè la via a Ziran.

Suenter ina curta notg èsi i vinavant la gievgia cun bels ed interessants inscunters cun ils quals nus avain mussà Ziràn sco lieu da viver e lavurar. Tranter auter ha Christ-Andri Hassler dà pled e fatg davart la rolla da piunier ed il svilup sin il sectur da l'energia Solara. In svilup extrem, dal reminent.

Tut in auter punct da vista sin vita e lavur ha la pura Emilia Gadient Clopath dà a nus. Ses exempel mussa a moda impressiunanta co che far il pur po funcziunar bain e far cuntent cun in simpel bain cun vatgas da latg. E quai malgrà tut las midadas cun maschinas modernas e dapli prescripziuns.

Venderdi ha lura nossa ultima visita cumplettà l'invista da Ziràn sco lieu da viver e lavurar. Gion Michael ha avert la porta da la scrinaria per nus e mussà ch'in svilup economic è senz'auter er pussaivel or en la periferia. Er sch'igl è magari ina sfida da chattar collavuraturAs che vulan vegnir da l'auter maun da la Viamala. Malgrà che Ziran è cun be mes'ura viada p. ex. datiers da Cuira.

Er durant nossas turas tras il vitg avain adina puspè entupà l'in u l'autra, als purtretà ed er rimnà uschiglio ina u l'autra impressiun da la pitschna vischnanca en Val Schons.

Ed anc in legher detagl per finir ...

ina buttiglia ed in magiel sirup da suvì sin ina maisa
Legenda: Sirup da suvì... Quai è LA bavronda da stad en la regiun da Ziràn. Tut, gea propi tut quels che han avert per nus lur portas han purschì a nus il sirup da suvì. Pertge? Fitg simpel: I dat simplamain massa suvì en la regiun. RTR, Seraina Derungs

Quai èsi stà da nossa visita a Ziràn-Reschen. Grazia fitg per guardar e tadlar ma er a tut quels e quellas che han visità, sustegnì ed avert lur portas per nus.

RTR, actualitad 11:00

Artitgels legids il pli savens

Scrollar a sanestra Scrollar a dretga