Siglir tar il cuntegn

Header

cuntegn

Revistas 2021 Da malsegirtad sur patgific la stad fin tar tensiun l'atun

  • Suenter il lockdown dal schaner suonda ina fasa in zic malsegira il favrer e mars cun cifras creschentas. Ditg n'èsi betg propi cler sch'il Cussegl federal schlucca las mesiras uschia che ustarias, kinos u centers da fitness pon puspè avrir. Ma lura èsi cler: Las terassas pon puspè avrir u era ils kinos ed autras purschidas cun capacitads limitadas.
  • Cun optimissem e schlantsch vai vers la stad. Il turissem quinta cun bunas frequenzas ed il Cussegl federal planisescha scenaris per ils proxims mais. L'obligatori da mascrina en il liber croda. E malgrà che blers dals festivals gronds èn gia vegnids annullads u spustads, po in u l'auter pli pitschen vegnir realisà, gea schizunt mess sin pais da nov. E cun la stad vegnan er ils certificats da Covid, però els n'èn anc betg necessaris en blers lieus.
  • Il fanadur restan las cifras bassas e p. ex ustieras ed ustiers a Cuira èn cuntents cun la fatschenta. Ma gia vers la fin da la stad, l'avust, cumenza la situaziun puspè a sa midar. Il dumber da persunas vaccinadas na crescha betg pli uschè svelt, percunter datti adina dapli novas infecziuns cun il coronavirus. E gia il settember tira il Cussegl federal puspè en la struba e schlargia l'obligatori da certificat. Da nov dovri el per quasi tut las occurrenzas endadens u er per visitas en l'ustaria.
  • I suonda in'emna da vaccinar naziunala cun pussaivladads da sa laschar vaccinar senza termin, bus da vaccinar sco era purschidas da cussegliaziun. Tuttina n'è il virus betg da franar. Il dumber d'infecziuns novas crescha vinavant. Er pliras chasas da tgira en il Grischun han da sbatter sur pliras emnas cul virus e las consequenzas per cussadentas e persunal. Mez november èn las cifras da cas activs sco er persunas ospitalisadas en il Grischun uschè autas sco anc mai durant la pandemia. Il virus sa derasa cunzunt er en las scolas, quai che maina lura ad in obligatori da mascrina per la scola primara.
  • Malgrà novas restricziuns e demonstraziuns di il surveran ils 26 da november in'ulteriura giada cler Gea a la Lescha da Covid-19. Las staziuns intensivas s'emplainan vinavant, novas mesiras sco 2G vegnan discutadas. Er ils tests facultativs ch'in ha stuì pajar a partir da l'october duain puspè daventar gratuits per in e scadina. L'entschatta da december schlargia il Cussegl federal tranter auter anc ina giada l'obligatori da mascrina e da certificat per occurrenzas endadens. Plinavant vegn dà liber la pussaivladad d'introducir 2G. A partir dals 20 da december vala lura er en Svizra 2G – divers pajais vischins han già introducì pli baud che la Svizra mesiras pli severas. Uschia na finescha il 2021 ord vista corona betg gist sco el ha cumenzà ma er betg uschè lunsch davent dal lockdown sco quai che tuts avessan gugent.

RTR actualitad 07:00

Artitgels legids il pli savens

Scrollar a sanestra Scrollar a dretga