Gronda debatta d'energia
Igl è in dals gronds dossiers ch'è vegni tractà en la sessiun dal Cussegl naziunal. Passa 10 uras ha la chombra gronda tractà il decret general d'energia. I duai vegnir pli simpel per far la midada sin energias regenerablas. Dentant il tema polarisescha.
Discutà è era vegnì davart la forza idraulica. Uschia duain 15 projects vegnir realisads pli svelt. Quels eran vegnids decidids ad ina maisa radunda inclusiv las organisaziuns da natira.
Nagin project supplementar
L'ovra idraulica «Chlus» na vegn betg agiuntada sco 16avel project a la glista per projects da producziun d'energia che duain vegnir bajegiads cun prioritad. Il Cussegl naziunal ha refusà cun 98 vuschs Na cunter 91 Gea la proposta individuala da la cussegliera naziunala grischuna Magdalena Martullo.
Ina nova emprova
L'autra gronda fatschenta da la sessiun è stada la refurma da la prevenziun per la vegliadetgna. La refurma cuntegna ina reducziun da rentas, la segunda pitga duai dentant da nov sustegnair dapli persunas. La refurma frunta dentant sin opposiziun. In referendum è annunzià.
Naginas armas per l'Ucraina
La dumonda sche la Svizra duai lubir il reexport d'armas e da muniziun en l'Ucraina sparta il Parlament federal. Tuttas duas chombras han debattà en chaussa, ellas han dentant decidì da betg schluccar las regulaziuns per l'export.
Dischillusiun da vart sanestra
Il parlament è sa cunvegnì, co che la politica agrara duai guardar ora ils proxims onns. Suenter il Cussegl dals chantuns ha er il Cussegl naziunal approvà la proposta senza finamiras supplementaras per il clima.
Nagin sustegn per iniziativa
L'iniziativa dals Giuvens liberals ha vulì colliar la vegliadetgna da la pensiun cun l'aspectativa da vita en Svizra. Sche lezza va ad aut muntassi quai automaticamain in auzament da la vegliadetgna da pensiun uffiziala. En in emprim pass fiss la vegliadetgna da pensiun vegnida auzada sin 66 onns per umens e dunnas.
Il Cussegl dals chantuns suonda la proposta dal Cussegl federal da refusar l'iniziativa senza cuntraproposta.
Avantatg per hotelaria ni vendita d'edifizis a persunas da l'exteriur?
Il chantun Grischun aveva adina puspè dà permiss per abitaziuns da persunal, era per persunas da l’exteriur. Ina sentenzia dal Tribunal federal ha però fatg cler – che questa pratica cuntrafa la lescha. Uss vul Martin Schmid puspè pussibilitar quai, cun adattar l'ordinaziun e la lescha correspundenta. Il Cussegl dals chantuns è suandà a la moziun. Dentant resta l'opposiziun envers l'intent grond. Era il Cussegl federal è cunter l'intent. Ins vul evitar che dapli edifizis van en mauns esters.
Dapli magistraglia – ma per tge pretsch?
Il Cussegl naziunal vul agir cunter la mancanza da magistraglia. Uschia ha la Chombra gronda decidì en la sessiun da primavaira che persunas cun ina maturitad professiunala duain pudair ir a scolas autas da pedagogia senza far l'examen d'admissiun.
Quella decisiun na cuntenta dentant betg a la represchentanta da la magistraglia Sandra Locher-Benguerel. La cussegliera naziunala grischuna che lavura sezza sco magistra ed è era vicepresidenta da la Scola auta da pedagogia dal Grischun a Cuira, è ina da las paucas che ha vuschà cunter la proposta.
