Decisiuns communalas - Tut las decisiuns communalas sin in'egliada

Cuira refusa credit per colliaziun a Brambrüesch

Il suveran da Cuira ha refusà cun bunamain 54% il credit per la colliaziun directa da Cuira a Brambrüesch. La citad da Cuira aveva dumandà ils da Cuira per in credit nov da 40,6 milliuns francs per finanziar la pendiculara. Necessari è quel vegnì perquai ch'ils custs per la colliaziun directa da Cuira a Brambrüesch cun ina pendiculara èn s'augmentads marcantamain ils davos set onns. Il motiv saja surtut la chareschia. Il 2019 aveva la populaziun approvà in credit da 24,4 milliuns francs.

Il suveran da Cuira ha percunter dà glisch verda a dapli daners per la biblioteca da la citad. 64% da las votantas ed ils votants vulan auzar la contribuziun annuala dad 1'089'000 francs sin 1'248'500 – pia 159'500 francs dapli per onn. Sco la citad scriva en il messadi vegnia la biblioteca nizzegiada da bleras persunas, na possia ord divers motivs dentant betg cuvrir ils custs. Oravant tut la chareschia haja auzà ils custs, p.ex. per servetschs dad IT. Ord quest motiv duai la contribuziun annuala da la citad vegnir auzada.

Vaz: nova infrastructura sper il Heidsee a Lai

Sper il Heidsee a Lai datti in nov «Lido», il suveran ha ditg cun bun 65% da las vuschs Gea ad in credit da 5,6 milliuns francs per demolir las veglias structuras e construir in nov areal da recreaziun. Il lai vegnia duvrà fermamain durant la stad per far bogn e sa divertir, l'infrastructura actuala na saja betg pli adattada al dumber da giasts. Las lavurs da construcziun duain cumenzar parallel cun la reconstrucziun dal mir da fermada dal lai, pia la stad 2027.

Mustér: suveran sustegna parc da gieus e moviment

Las pendicularas da Mustér vulan realisar in nov parc da gieus e moviment sin l'areal dal Center da Fontauna. Quel vegn a custar tranter 9 e 10 milliuns francs. Il suveran ha decis cun 65% da las vuschs che la vischnanca duai sa participar als custs cun desister da la restituziun da debits dad 1,75 milliuns francs – dad in credit che la vischnanca aveva concedì a las pendicularas per realisar la pendiculara Sedrun-Cuolm da Vi.

«Sanadura» – in cler Gea a San Murezzan

Sco ina da las davosas vischnancas da l'Engiadin'Ota ha San Murezzan ditg cleramain e cun dapli che 95% Gea a la nova structura per il provediment da sanadad en la regiun. Quai per l'ina a la lescha per crear la «Sanadura» e per l'autra a las trais novas cunvegnas da prestaziun en quest connex. Uschia han uss 10 dad 11 vischnancas approvà la lescha. La davosa vischnanca che sto anc decider è Zuoz, lezza ha spustà lur radunanza communala dals 4 da mars.

Albula/Alvra survegn ina nova constituziun

La vischnanca surlavura 11 onns suenter la fusiun la constituziun communala, ina maioritad clera da passa 89% ha acceptà la nova constituziun. Ina midada centrala è il termin d'elecziun per il presidi communal. Quel duai en il futur gia esser en l'emprim semester da l'onn. Quai dettia dapli temp per ina surdada ordinada. In'ulteriura novaziun impurtanta è l’introducziun d’in cussegl da scola cun tschintg commembers che vegn elegì a l’urna. Però datti er reglas pli cleras davart sesidas, proceduras da decisiun e cumpetenzas da las autoritads.

Trais giadas Gea a Flem

Il suveran da Flem ha dà glisch verda ad in credit da 700'000 francs per revitalisar tschintg anteriurs foss da sauaziun. La decisiun è stada clera cun 80% Gea. Ils foss sa chattan tant en l'ost sco en il vest da la vischnanca e duain cun la revitalisaziun puspè manar aua durant la stad. Il project è ina mesira substitutiva per cumpensar intervenziuns en spazis da viver sensibels.

Plinavant ha la populaziun er approvà cleramain cun bun 86% la revisiun parziala da la planisaziun locala per la cuntrada da palì «Plaun Segnas Sut». Las vischnancas ston proteger las cuntradas da palì e cun la revisiun planisada vegnan las zonas da protecziun definidas ed ils cunfins da la cuntrada «Plaun Segnas Sut» fixads.

Sco terz project han ils da Flem er approvà la revisiun parziala dal plan general d'avertura, quai cun stgars 85%. Quel definescha nua che stabiliments da provediment e d'allontanament èn situads. Plinavant èn era parcadis, indrizs d'ennavar e sendas da viandar e trails da bike integrads en il plan general d'avertura. L'actual plan da Flem è da l'onn 2002 e n'è silsuenter mai vegnì surlavurà grond. Perquai na correspundia quel betg pli a la situaziun actuala.

Brusio: Migliacci elegì sco president communal

A Brusio en la Val Poschiavo è Davide Migliacci vegnì elegì sco nov president communal. Sco che «Il Bernina» rapporta ha il politicher da la PPS fatg 313 vuschs (57%). Ses cuntracandidat, Giancarlo Plozza (independent), è vegnì sin 234 vuschs (42%). La participaziun muntia a 73%. Davide Migliacci suonda cun quai a Pietro Della Cà. Quel aveva gia il mars passà annunzia da sa retrair dal post sin il zercladur 2026, cura che ses mandat en il Cussegl grond va era a fin. Sco motiv ha el inditgà ch'el n'haja betg pli la forza per quest post pretensius.

Claustra: duas giadas Gea

Il suveran da Claustra ha dà glisch verda al project da las pendicularas da Tavau Claustra da remplazzar la pendiculara da Schifer sin il Weissfluhjoch. Cunquai che la nova pendiculara è sin quasi il medem traject na dovri nagina midada da la planisaziun locala – sulettamain il contract da servitut sto vegnir adattà. Il nov contract vala enfin ils 31 da matg 2086.

Plinavant ha la populaziun da Claustra approvà in credit da 4,6 milliuns francs per sanar las vias da guaud en il territori «Riss Monbiel». Las vias sajan radund 60 onns veglias e betg pli adattadas per ina cultivaziun moderna dal guaud. Il chantun vegn pli probabel a surpigliar 71% dals custs. Per la vischnanca restan alura anc custs dad 1,34 milliuns francs.

Arosa sviluppescha sia rait da bike

68% da las votantas ed ils votants d'Arosa vulan reveder parzialmain la planisaziun locala per il «Masterplan Bike». La revisiun è necessaria per pudair construir divers trails da velo e per separar sendas da viandar dals trails da bike.

A Malans datti ina canorta d'uffants

Cun in cler Gea da 68 pertschient ha il suveran da Malans approvà in credit da 2,45 milliuns francs per ina canorta d'uffants. Per quest intent vegn sanà in bajetg che tutga a la vischnanca e nizzegià da nov sco canorta. Previs èsi che la canorta va en funcziun la primavaira 2028.