Las partidas grischunas han ils ultims mais preschentà lur candidatas e candidats per la regenza grischuna. En tut èn enconuschents fin uss 8 candidatas e candidats, 4 dunnas e 4 umens:
-
Bild 1 von 8. Peter Peyer da la PS candidescha per sia terza ed ultima perioda d'uffizi. Bildquelle: Keystone.
-
Bild 2 von 8. Era Marcus Caduff dal Center candidescha per sia terza ed ultima perioda d'uffizi. Bildquelle: Keystone.
-
Bild 3 von 8. Carmelia Maissen dal Center candidescha per sia segunda perioda d'uffizi. Bildquelle: Keystone.
-
Bild 4 von 8. Martin Bühler da la PLD candidescha medemamain per sia segunda perioda d'uffizi. Bildquelle: PLD.
-
Bild 5 von 8. Da nov en la regenza vul Nora Saratz Cazin da la PVL ed uschia conquistar l'emprim sez da la partida. Bildquelle: PVL.
-
Bild 6 von 8. Cun Aita Zanetti vul il Center defender ses terz sez en la regenza. Bildquelle: RTR.
-
Bild 7 von 8. Valerie Favre Accola vul conquistar l'emprim sez per la PPS dapi il 2008. Bildquelle: PPS.
-
Bild 8 von 8. Cun Maurizio Michael vul la PLD in segund sez en la regenza. Bildquelle: RTR.
Il Center vul defender ses trais sezs
La partida dal Center vul defender ses trais sezs en la regenza grischuna. Sper ils cussegliers guvernativs actuals Marcus Caduff e Carmelia Maissen vul la partida dal Center defender ses terz sez cun Aita Zanetti, la presidenta communala da Scuol.
Il cusseglier guvernativ actual Jon Domenic Parolini na po betg pli candidar, cunquai ch'el ha la fin dal 2026 cuntanschì la limita dal temp d'uffizi da 12 onns.
La PLD va cun dus candidats en cursa
La partida liberaldemocratica ha actualmain in sez en la regenza. Tar las elecziuns ils 14 zercladur 2026 vul ella conquistar dus.
Gia pli ditg era cler che Martin Bühler – ch’è dapi il 2023 en l’executiva – candidescha puspè. La testa da la partida ha alura decidì dad ir en la cursa cun duas persunas, e nominà Maurizio Michael. Unanimamain han ils delegads e las delegadas sustegnì questa candidatura. L'um da Castasegna, il vitg en la vischnanca da Bregaglia, è gia dapi il 2010 en il Cussegl grond. E dapi il 2024 è el il president da la PLD grischuna.
La PVL vul ses emprim sez en la regenza
La Partida verd-liberala grischuna ha nominà Nora Saratz Cazin uffizialmain sco candidata per la regenza grischuna. Actualmain è la politicra da 43 onns presidenta da la fracziun verd-liberala en il Cussegl grond e presidenta communala da Puntraschigna.
Nora Saratz Cazin candidescha per l'emprim sez da la Partida verd-liberala en la regenza grischuna. L'ultima giada aveva la partida preschentà ina candidatura il 2014. Da lez temp aveva Jürg Kappeler candidà, n'è dentant betg vegnì elegì.
Tar la PS resta Peter Peyer il sulet candidat
Il cusseglier guvernativ Peter Peyer resta l'unic candidat socialdemocrat per las elecziuns da la regenza chantunala. Quai è sa mussà l'entschatta favrer durant ina radunanza extraordinaria da la partida. Las schanzas da success d'ina segunda candidatura fissan memia bassas.
Sco che la presidenta da la PS Grischuna, Julia Müller, aveva ditg envers RTR, fiss la partida gugent ida cun ina segunda persuna en la cursa. Ideal fiss stà ina dunna. I dettia er persunas entaifer la partida ch'hajan da principi interess, dentant nagina che veglia exnum candidar gia quest onn.
La PPS vul conquistar ses emprim sez dapi il 2008
La PPS dal Grischun va cun Valérie Favre Accola en il cumbat electoral per l'elecziun da la regenza il zercladur. Valérie Favre Accola è l’avust 2025 vegnida elegida sco presidenta dal Cussegl grond. Il pensum da quests dus posts na sa cruschan betg cun quai che la plazza en la regenza surprendess ella plir ils 1.1.2027.
Sche Favre Accola vegniss elegida, lura fiss quai l'emprim sez da la PPS en la regenza grischuna dapi il 2008. L'ultima giada avant quatter onns aveva Roman Hug candidà per la regenza, aveva lura pers la cursa sco sisavel, è dentant in onn pli tard vegnì elegì en il Cussegl naziunal.
Sper la regenza elegia il suveran grischun ils 14 da zercladur 2026 er ils 120 deputads e deputadas che duain seser en il Cussegl grond, pia il parlament dal chantun Grischun.