Ils 8 da mars decida il suveran svizzer davart quatter differents projects da votaziun. Cun smatgar sin il link cotschen pudais siglir sin la fatschenta correspundenta:
- Iniziativa SRG SSR
- Lescha federala davart l'imposiziun da taglia individuala
- Iniziativa per daners bluts
- Iniziativa per in fond per il clima
Il Na a l'iniziativa SRG SSR sa rinforza lev
Radund trais emnas avant las votaziuns avessan 54% da las persunas dumandadas refusà l'iniziativa SRG SSR. Quai resulta da la segunda retschertga che l'institut da perscrutaziun Gfs Berna ha fatg per incumbensa da la SRG SSR. 44% da las votantas e dals votants avessan ditg Gea. Quai èn sin vart dals adversaris ed dals aderents mintgamai 2 puncts procentuals dapli che anc en l'emprima enquista.
Mo 2% èn anc indecis – la furmaziun da l'opiniun è cun 85% avanzada il pli fitg. En egl dat vinavant la discrepanza tranter l'intenziun actuala da votar e l'aspectativa: Malgrà il trend Na quintan 54% dals participants e da las participantas cun in'approvaziun a l'urna.
L’Iniziativa SRG SSR mussa ina lingia da conflict ch’è marcada fermamain da la separaziun tranter sanester e dretg. Quai è era tar la segunda retschertga anc il cas.
- Votants da la PS, dals Verds, da la PVL e dal Center refusan cleramain l’iniziativa SRG SSR.
- Tar simpatisants da la Partida populara svizra datti in cler consentiment per l’iniziativa SRG SSR.
Sper la dimensiun da la politica da partida sa manifestescha però en la discussiun davart l’Iniziativa SRG SSR era la confidenza u disfidanza envers la regenza:
- Persunas che fidan a la regenza refusan pli ferm l’iniziativa SRG SSR che anc tar l’emprima enquista.
- Tar gruppas criticas envers la regenza è ina maioritad stabila per in Gea l’iniziativa SRG SSR
Stgars Gea: L'imposiziun da taglia individuala perda sustegn
L'imposiziun da taglia individuala mussa vinavant in stretg consentiment cun 52% Gea e cun 44% Na. En egl dat dentant la reducziun massiva da la quota dal Gea da 12 puncts procentuals envers l'emprima enquista in mais avant. Igl è ina reducziun nunusitadamain ferma per in temp uschè curt.
Il project perda spezialmain vuschs tar persunas che stattan datiers dal Center e da la PPS (parolas Na), tar ils umens, persunas en Svizra tudestga e tar persunas cun ina furmaziun media u bassa. Mantegnair il Gea po il project tar simpatisants da la PS e dals Verds, dunnas e persunas cun in aut nivel da furmaziun.
Iniziativa per daners bluts e cuntraproposta directa sin curs d'approvaziun
Sch'i fiss vegnì votà gia ils 14 da favrer, avessan 61% dals participants segir u plitost votà per l'iniziativa per daners bluts. Quai munta ina reducziun da 4 puncts procentuals cumpareglià cun l'emprima retschertga. 36% fissan segir u plitost cunter (+5 puncts). 3% èn anc indecis.
Anc pli cler en avantatg è il cuntraproject direct: 70% approvassan il project (+3 puncts), 24% fissan encunter. En la dumonda decisiva preferescha ina clera maioritad il cuntraproject (54%) envers l'iniziativa (41%).
Cler trend cunter il fond per il clima
L'iniziativa avess survegnì mez favrer 65% vuschs Na e mo 31% da las votantas e dals votants avessan ditg Gea. 4% n'han betg exprimì in'opiniun. Uschia è il trend al Na s'accentuà anc pli fitg. Mo il champ sanester-verd sustegna anc la proposta. 87% dals dumandads quintan cun in Na a l'urna.
Ils arguments numnads principalmain cunter l'iniziativa èn la tema da grondas expensas statalas, ch'ins è da l'opiniun che ils instruments existents bastan e ch'ins tema ch'il stadi surpiglia memia blera controlla enstagl da rinforzar iniziativas privatas.
