Siglir tar il cuntegn

Header

audio
Revista 2022: Corona
Or da Actualitad dals 27.12.2022. Maletg: SRF
laschar ir. Durada: 6 minutas 13 Secundas.
cuntegn

Revistas 2022 Adia, mesiras da corona!

Suenter dus onns pandemia è quest onn finalmain vegnì il di X: Il di senza mesiras e restricziuns, il di enavos en la normalitad e quai malgrà ch'il cumenzament da l'onn pareva il mund anc auter ed i era gnanc da patratgar che Corona perda entaifer l'onn impurtanza.

  • L'onn 2022 cumenza amez l'unda dad Omicron. Tgi che ha festivà la midada en l'onn nov ha stuì far quai cun tegnair en las mesiras da 2G+, pia cun test e certificat. Il Cussegl federal è perfin pront da prender mesiras anc pli severas. Fin schaner cuntanschan las cifras da novas infecziuns cun il virus perfin in nov record.
  • Ma lura vegn da Berna tuttenina in'auter signal. Il temp dad isolaziun e quarantina vegn reducì. Il Cussegl federal vul dentant prolungar las mesiras da Corona e quai enfin la fin mars. Quella decisiun vegn tramessa en consultaziun als chantuns.
  • Il chantuns èn per gronda part dal medem avis. Els èn stanclentads da las mesiras e vulan che lezzas vegnan be prolungadas enfin la fin da favrer.
  • E lura – la glisch verda a la fin da l'orizont: perquai che las cifras da record fin schaner n'hajan betg chaschunà ina surchargia tar il sistem da sanadad decida il Cussegl federal da trametter en consultaziun variantas per schluccar las mesiras.
  • Ils chantuns èn per gronda part da l'avis che la varianta d'abolir tut las mesiras enfin ils 17 da favrer è la dretga via. Plinavant abolescha la regenza era gist tut las mesiras chantunalas. E lura datti era sin palancau federal in grond pass envers normalitad.
  • La mascrina resta per gronda part en satg: vegn be pli en funcziun en il traffic public e las instituziuns da sanadad ed ils certificats na dovri era betg pli e homeoffice n'è betg pli recumandà. Il cumenzament da questa nova libertad – per blers e bleras anc nunusità.
video
Emprim di cun schluccadas
Or da Telesguard dals 17.02.2022.
laschar ir. Durada: 4 minutas 39 Secundas.
  • La vita sociala e la cultura reviva puspè. Musica, teaters, sport, art ed occurrenzas.
  • Gnanc dus mais pli tard scrodan lura era las davosas mesiras sin l'emprim d'avrigl.
  • I suonda ina stad da libertads, occurrenzas grondas che han puspè lieu ed il gust da viandar turna puspè enavos, quai sentan cunzunt era ils biros da viadi che han puspè dapli cudeschaziuns.
  • Envers l'enviern turna la malsegirtad e la tema dad in'ulteriura unda in zic, ma senza giustificaziun.
  • L'onn 2022 va a fin cun tut autras crisas che quella da Corona. Lezza para almain per il mument emblidà. Cun l'unda da grippa la fin da l'onn creschan ils cas puspè in zic. Ma la gronda crisa è vinavant lunsch davent.

RTR actualitad

Artitgels legids il pli savens

Scrollar a sanestra Scrollar a dretga