Siglir tar il cuntegn

Header

cuntegn

Revistas 2022 Istorgias ch’èn idas a cor

Mintga regiun ha sias atgnas istorgias. Ils redacturs e las redacturas regiunalas preschentan las istorgias las pli spezialas da l'onn passà.

Grischun tudestg – da schanzas, cursas ed in destin persunal

27'000 persunas han visità la chapitala per celebrar in spectacul sportiv. Durant il Big Air Cuira 2022 han sportistas e sportistas da freestyle mussà tge ch'ellas ed els san. Er la musica ha attratg divers aspectaturs.

audio
Istorgias dal Grischun tudestg ch'èn idas a cor
ord Actualitad dals 30.12.2022. Maletg: RTR
laschar ir. Durada: 4 minutas.

Istorgias da success e pel-giaglina hai er dà tar las cursas da chavals a Maiavilla. Tranter auter han ils chavals dal engiadinais Duri Casti, ina legenda en il sport da chavals, piglià part.

Amina Ovcina Cajacob da la Bosnia passenta retrospectivas sch’ella auda ni vesa novitads da la guerra en l’Ucraina. Cura ch’ella era 12 onns veglia è la guerra da la Bosnia rutta or. Per quatter onns ha Amina Ovcina Cajacob vivì cun sia sora e ses geniturs en in tschaler. 

Grischun Central – da parcs, sur utschels fin ad in record mundial

La primavaira è vegnì enconuschent, che l’uniun Parc Ela dovra in nov president. Paolo Giacometti dat giu il presidi suenter set onns en uffizi, en suprastanza è el stà schizunt 12 onns. Il pli bel saja stà per el la buna collavuraziun cun la differenta glieud entaifer l’uniun. Il zercladur ha il Parc Ela organisà la festa da musica Parc Ela. Ed ella è stada in success.

audio
Istorgias dal Grischun Central ch'èn idas a cor
ord Actualitad dals 29.12.2022. Maletg: RTR
laschar ir. Durada: 5 minutas 33 Secundas.

A Lantsch è vegnida inaugurada la nova via dad ir cun skis cun rodas da quatter kilometers lunghezza tar l’Arena da biatlon il settember. Selina Gasparin ch’è oz sviluppadra da talents U18 ha ditg, che questa novaziun dettia novas pussaivladads da trenar la stad. Ussa saja finalmain pussaivel da trenar a moda segira era la stad, ha ditg l’anteriura biatleta.

La stad ha RTR tranter auter visità la hobi ornitologa Astrid Thurner da Savognin, nua ch’ella ha raquintà davart la fascinaziun d’observar utschels. Tranter auter ha ella raquintà ch’ils medems utschels che vivan giu la bassa tschivlian auter che quels che vivian en la periferia.

In dals puncts culminants da l’onn 2022 è franc stà il record mundial da la Viafier retica ils 29 d’october. In tren da prest dus kilometers lunghezza è cursà da Preda ad Alvagni. Il tren è uschia vegnì purtà en en il cudesch da records mundials da Guiness.

Engiadina – da premis, chant ed ina nova vita regalada

Dapi plirs onns gudogna il giuven trumbettist Simon Gabriel da S-chanf in premi suenter l’auter. Tranter auter po il giuven da 14 onns sa numnar dapi quest onn «Campiun da solo grischun». Muments da success e superbia ha er pudì passentar Mema Etter da Sent. La dunna che ha publitgà cun 90 onns ses emprim cudesch.

audio
Istorgias da l'Engiadina ch'èn idas a cor
ord Actualitad dals 28.12.2022.
laschar ir. Durada: 5 minutas 58 Secundas.

Per Ladina Näff da Ramosch è il 2022 quel onn nua che sia vita s’è midada grazia ad ina donaziun d’in organ.

Ina da las grondas occurrenzas en l'Engiadina era stà il Festival da la Chanzun rumantscha a Zuoz il zercladur 2022.

Surselva – dad animals, festas e politica

Las 15 vischnancas da la Surselva han gì da decider sco mintg’onn sur da preventivs e leschas. Grondas discussiuns hai dà per exempel tar la lescha da polizia en la vischnanca da Trun ubain tar l’introducziun da tempo 30 a Glion.

audio
Istorgias da la Surselva ch'èn idas a cor
ord Actualitad dals 27.12.2022. Maletg: RTR
laschar ir. Durada: 4 minutas 7 Secundas.

In’istorgia da la Lumnezia ha fatg sensaziun betg mo en Surselva ed il chantun, mabain en l’entira Svizra. La muschna, da las muschnas, ch’è vegnida dismessa senza dumandar.

Ed era ils animals han procurà per novas. Dasper ils lufs – che dattan adina da discutar – surtut ils utschels e l’emprima famiglia da casturs en la Cadi.

Suenter la pandemia e las restricziuns èsi vegnì fatg festa en Surselva, e quai cun musicals, operas ed open-airs. E la finala las festas grondas cun il pli aut Svizzer, cun Martin Candinas a Mustèr ed a Rabius.

RTR actualitad

Artitgels legids il pli savens